Қирғизистондаги «Қумтор» олтин конини ўзлаштириш билан шуғулланган Канаданинг Centerra gold компанияси конни ўз балансидаги активлари рўйхатидан чиқариб ташлади. Бу ҳақда Қирғизистон Вазирлар Маҳкамаси раҳбари Оқилбек Жапаровнинг матбуот хизмати тарқатган баёнотда айтилади.

Қайд этилишича, Centerra gold 926 миллион долларни баланс қийматидан ҳисобдан чиқаришга ва «Қумтор» кони устидан назоратни йўқотганини акс эттиришга мажбур бўлган.

«Бир неча соат олдин, Канада вақти билан 19 ноябрь, жума куни кечки пайт, биржа савдолари якунланганидан сўнг Centerra gold энди қирғиз халқининг миллий бойлиги — ‘Қумтор’ конига эгалик қилмаслигини тан олишга қарор қилди», дейилади хабарда.

Баёнотга кўра, бундай қарор компания томонидан Онтарио қимматли қоғозлар комиссияси сўровига кўра қабул қилинган.

«Қирғизистон ҳукумати биринчи кунданоқ компания раҳбариятини мамлакатимиз табиати ва иқтисодиётига етказилган катта зарарни тан олишга чақирди. Ўйлаймизки, халқаро ҳамжамият тез орада гап инвесторлар манфаатларини бузиш ҳақида эмаслигига ишонч ҳосил қилади. Вазирлар Маҳкамаси бундан кейин ҳам Қирғизистон халқининг қонун устуворлиги ва миллий манфаатларини фаол ҳимоя қилади», — дея хулоса қилган Жапаров.

Маълумот учун, «Қумтор» Қирғизистоннинг шимоли-шарқий қисмида жойлашган бўлиб, кондан йилига 15 тоннага яқин олтин қазиб олинади. Centerra gold уни ишлаб чиқишда ўтган асрнинг 90-йиллари ўрталаридан бошлаб иштирок этган. Бироқ 2021 йилнинг баҳорида Қирғизистон ҳукумати корхонада ташқи бошқарувни жорий қилган ва республика ҳукуматини коннинг ягона эгасига айлантирган.

Аввалроқ Қозоғистон Россия орқали Украинага кўмир етказиб беришда айрим чекловлар борлигини тан олганди.