Евро инфляцияси декабрь ойида рекорд даражада тезлашди
Инфляцининг 5 фоизни ташкил этиши евронинг 20 йиллик тарихида илк бор кузатилди.
Евроҳудудда инфляция 2021 йилнинг декабрь ойида рекорд даражада тезлашди. Бу ҳақда Financial Times Европа статистика хизмати маълумотларига таяниб хабар берди.
Маълум қилинишича, 2021 йилнинг декабрь ойида евроҳудуднинг 19 та давлатида йиллик инфляция 5 фоизни ташкил этган. Бу евронинг деярли йигирма йиллик муомаласи давридаги рекорд кўрсаткичдир.
Маълумотларга кўра, таҳлилчилар томонидан инфляция кўрсаткичининг охирги рекорд қайд этилган ноябрдаги 4,9 фоиздан 4,7 фоизга тушиши тахмин қилинган. Бироқ, нархларнинг, биринчи навбатда, энергия ва озиқ-овқат маҳсулотларининг кўтарилиши фақат суръатни тезлаштирган.
Қайд этилишича, рекорд даражадаги инфляция Европа Марказий банки (ЕМБ)га пандемия шароитида талабни рағбатлантириш чораларидан қисман воз кечиш учун босимни оширади. Бозор 2022 йил январь ойидан бошлаб нархлар ўсишининг секинлашишини кутаётганига қарамай, инфляция суръатлари йилнинг кўп қисмида ЕМБнинг 2 фоиз кўрсаткичидан ошиб кетишда давом этади.
«Ҳозирда нархларнинг ўсиши ўзининг энг юқори чўққисида, аммо инфляция ҳеч бўлмаганда ёз охиригача прогнозлардан юқори бўлиб қолади — бу вақт давомида юқори энергия нархларининг таъсири истеъмол сектори ва иқтисодиётнинг бошқа қисмларига таъсир қилади», — деган ING глобал макроиқтисодиёт тадқиқотлари раҳбари Карстен Бжески.
Евростат маълумотларига кўра, пандемия ва ковид чекловлари даврида ўзгарган глобал таъминот занжирлари фонида энергия ресурслари бир йил олдингига нисбатан 26 фоизга қимматлашган. Ушбу кўрсаткични, шунингдек, озиқ-овқат нархларининг ўсишини ҳисобга олмаганда, евроҳудуддаги базавий инфляция декабрь ойида йиллик кўрсаткичда 2,6 фоизни ташкил этган.
Шунингдек, таҳлилчилар инфляциянинг секинлашишини энергия нархларининг барқарорлашуви, таъминот занжирларининг тикланиши ва давлатлар томонидан аҳолини қўллаб-қувватлаш учун жорий қилинган бир қатор пандемия имтиёзларининг тўхтатилиши билан боғламоқда.
Аввалроқ дунёда инфляция туфайли кафолатсиз активларга инвестициялар кўпайиши мумкинлиги хабар қилинганди. Шунингдек, Россияда инфляция 2022 йили рекорд даражага етиши кутилаётгани ҳақида хабар берилди.