Россиялик миллиардер Алексей Кузьмичевнинг иккита яхтаси тадбиркор Европа Иттифоқининг санкциялар рўйхатига киритилганидан сўнг Францияда ҳибсга олинди. Бу ҳақда Liberation хабар бермоқда.

Маълум қилинишича, гап узунлиги 17 метр бўлган La Petite Ourse яхтаси ва узунлиги 26 метр бўлган бошқа кема ҳақида кетмоқда. Кузмичевнинг яхталари Франциянинг Денгизбўйи-Альп департаменти расмийлари томонидан Европа Иттифоқи санкцияларини амалга ошириш доирасида ҳибсга олинган.

La Petite Ourse Канн портида бўлган, иккинчи қайиқ Антибдаги кемасозлик заводида таъмирланаётганди. Кемалар мос равишда 20 миллион ва 50 миллион еврога баҳоланмоқда. Таъкидланишича, аввалроқ божхона хизмати яхталарга ташриф буюриб, Кузмичевга уларнинг активларини музлатиш нияти ҳақида хабар берган.

Расмий равишда иккала кема ҳам Малтадаги Orangerie Marine limited компаниясида рўйхатдан ўтган, бироқ Франция Иқтисодиёт вазирлиги органлари ушбу яхталарнинг ҳақиқий эгаси Letter One’нинг эгаси, дея ҳисобламоқда.

Қайд этиш керакки, Европа Иттифоқи 15 март куни россиялик энг бой тадбиркорларга, жумладан, Letter One’нинг эгалари Михаил Фридман, Петр Авен, Герман Хан ва Алексей Кузьмичевга қарши янги санкциялар киритди. Шундан сўнг, Кузьмичев шериклари билан биргаликда «Альфа-банк» бенефициарлари сафини тарк этди. Тадбиркорлар Letter One директорлар кенгашидан ҳам кетди.

Аввалроқ Гибралтар россиялик миллиардер Дмитрий Пумпянскийнинг яхтасини ҳибсга олгани хабар қилинганди. Шунингдек, Мэн ороли россиялик миллиардерларнинг саккизта самолётини рўйхатдан чиқаргани ҳақида хабар берилди.