Гибралтарда Пумпянскийнинг яхтаси ҳибсга олинишига JPMorgan алоқадорлиги маълум қилинди
АҚШ банки санкцияга учраган мижоздан қарзни ундириш бўйича судга мурожаат қилган.
Санкцияга учраган россиялик миллиардер Дмитрий Пумпянскийга тегишли яхтанинг ҳибсга олиниши ортида АҚШнинг энг йирик банки JPMorgan турибди. Бу ҳақда Bloomberg хабар берди.
Пумпянскийнинг Axioma яхтаси Гибралтар порт маъмурияти томонидан ҳибсга олинган эди. Маълумотларга кўра, ҳибсга олиш JPMorgan даъвоси бўйича суд томонидан санкцияларга учраган шахсдан қарзни ундириш учун рухсат этилган. Бу илк шундай суд жараёнларидан биридир.
Гибралтар расмийлари яхтани «тегишли даъволар билан кредиторлар манфаатларини кўзлаб» қўлга олганини маълум қилди.
«JPMorgan кредитлар бўйича ўз ҳуқуқларига мувофиқ ҳаракат қилмоқда», — деди Гибралтар ҳукумати вакили.
«Совет» юридик гуруҳининг ҳуқуқ масалалар бўйича маслаҳатчиси Владислав Журавлевнинг қайд этишича, Пумпянский яхтани бир пайтлар JPMorgan кредит маблағлари ҳисобига сотиб олган ва у банк гаровига қўйилган. Унинг сўзларига кўра, банк кредит кечиктирилгани учун яхтани ундиришга уринмоқда, шунинг учун кема ҳибсга олинган.
«Бироқ, бу Британия ташқи ишлар вазири Лиз Трусснинг яхта ‘фақат Пумпянскийга тегишли’ деган баёнотига қанчалик мос келиши аниқ эмас. Қандай бўлмасин, банк олдидаги қарзи туфайли яхтани ундириш уни санкциялардан олиб ташлайди», — деди ҳуқуқшунос.
Пумпянский 10 март куни Европа Иттифоқи санкцияларига учраган, бир неча кундан кейин эса Буюк Британия унга қарши санкциялар жорий қилган. Март ойининг охирида Axioma яхтаси охир-оқибат Пумпянскийга тегишли эканлигини Буюк Британия ташқи ишлар вазири Лиз Трусс эълон қилди.
Пумпянский санкциялар рўйхатига киритилганидан сўнг, 90,6 фоиз улушига эга бўлган Қувур металлургия компаниясининг бенефициари бўлишни тўхтатди ва директорлар кенгашини тарк этди.
Refinitiv shipping маълумотларига кўра, Axioma 27 февраль куни Кариб денгизидаги Антигуа оролини тарк этган ва сўнгги уч ҳафта давомида Атлантика океанини кесиб ўтиб, Гибралтарга етиб келган. 72 метрли кема Британиянинг Виржиния оролларидаги Pyrene investments ҳолдинг компаниясига тегишли. Пумпянский яхтани 68,84 миллион долларга (62,5 миллион евро) сотиб олган.
Аввалроқ Финляндия ва Гибралтарда Россиянинг 22 яхтаси ҳибсга олингани хабар қилинганди. Шунингдек, JPMorgan метаоламда ваколатхона очган биринчи банк бўлгани ҳақида хабар берилди.