«Тошкент» Республика фонд биржаси кузатув кенгашининг 2022 йил 15 августдаги йиғилишида Георги Отарович Паресишвилини биржа бошқарув раиси сифатида жалб қилишга қарор қабул қилинди. Бу ҳақда Молия вазирлиги матбуот хизмати хабар берди.

Маълум бўлишича, Гиорги Паресишвили 2014 йилдан ҳозиргача Грузия фонд биржасининг раҳбари бўлиб келган. Шу билан бирга Грузия Марказий қимматли қоғозлар депозитарийси кузатув кенгашининг раиси бўлган.

Қайд этилишича, банк соҳасида ва капитал бозорида 27 йиллик тажрибага эга юқори малакали хорижий топ-менежерни жалб этиш тўғрисидаги қарор Ўзбекистон капитал бозорини ривожлантириш стратегиясининг бажарилиши ва амалга оширилиши муносабати билан қабул қилинган.

Гиорги Паресишвилининг асосий вазифалари маҳаллий фонд бозорини халқаро капитал бозори инфратузилмасига интеграциялаш, шунингдек, маҳаллий акциядорлик жамиятларининг IPO ва SPOларини ўтказишда ёрдам бериш ҳисобланади.

Янги бошқарувчининг вазифаларига қуйидагилар киради: иш самарадорлигини ошириш, халқаро илғор тажрибалар асосида листинг ва савдо қоидаларни такомиллаштиришга доир тавсиялар бериш, листинг компаниялари сонини кўпайтириш, умуман бозор инфратузилмаси, IT комплекси фаолияти самрадорлигини ошириш мақсадида бозорнинг тегишли иштирокчилари билан яқин хамкорлик қилиш.

Маълумот ўрнида, Георгий Паресишвили 1995 йилда Тбилиси давлат университетининг иқтисод факулътетини тамомлаган. Меҳнат фаолиятини Тбилисидаги Absolyut Bank’да бошлаган. 2000–2002 йилларда Мичиган университети Стивен М. Росс бизнес мактабида таҳсил олган ва Бизнес бошқаруви магистри (МБА) даражасини олган.

2000 йилдан 2005 йилгача Лондон ва Нью-Йоркда Швейцариянинг энг йирик молиявий конгломерати Credit Suisse инвестисия банкининг бўлими бўлган Credit Suisse First Boston’да ишлаган. 2005 йилдан бери Георгий Паресишвили Грузиянинг Terabank, Liberty Bank, Bank of Georgia ва бошқа етакчи банкларида бошқарув лавозимларда ишлаган.

Аввалроқ Халқаро ҳамкорлик ва тараққиёт агентлигига янги раҳбар тайинланганди. Унга кўра, Шоҳруҳ Раҳимов Инвестициялар ва ташқи савдо вазирлиги ҳузуридаги Халқаро ҳамкорлик ва ривожланиш агентлиги директори этиб тайинланган.

Шоҳруҳ Раҳимов ушбу лавозимга тайинлангунга қадар Инвестициялар ва ташқи савдо вазирлигининг турли таркибий бўлинмалари ҳамда бошқа ташкилотлар ва тармоқ бирлашмаларида раҳбарлик лавозимларида фаолият юритган.