Ҳиндистон «Эксимбанк»и томонидан Ўзбекистонда инфратузилмавий ривожланиш ва таълим соҳаларида устувор лойиҳаларни амалга оширишни молиялаштириш учун 448 миллион доллар миқдорида маблағлар ажратилади. Бу ҳақда Инвестициялар ва ташқи савдо вазирлиги матбуот хизмати хабар берди.

Қайд этилишича, Инвестициялар ва ташқи савдо вазирлигида бош вазирининг ўринбосари — инвестициялар ва ташқи савдо вазири Сардор Умурзоқов Ҳиндистон Республикасининг Ўзбекистондаги фавқулодда ва мухтор элчиси Маниш Прабҳат билан учрашган.

Учрашувда инвестициявий, савдо-иқтисодий, маданий-гуманитар соҳалардаги ҳамкорликка қаратилган икки томонлама муносабатларнинг кун тартиби кўриб чиқилган.

Хусусан, томонлар Ўзбекистон билан Ҳиндистон ўртасида Имтиёзли савдо битими ва Инвестицияларни рағбатлантириш ҳамда ўзаро ҳимоя қилиш тўғрисидаги битимни ишлаб чиқишни тезлаштириш ва уларни қисқа муддатларда имзолаш долзарблигини таъкидлаган.

Ўзбекистон томони савдо-иқтисодий масалалар бўйича қўшма Ишчи гуруҳ тузиш ташаббусини олқишлаган. Яқин вақтда Ишчи гуруҳнинг биринчи йиғилишини ташкил этиш имконияти ва унинг кун тартиби бўйича таклифлар кўриб чиқилган.

Томонлар 2022 йилнинг биринчи чорагида бўлиб ўтадиган Ўзбекистон Республикаси ва Ҳиндистон Республикаси ўртасидаги савдо-иқтисодий, илмий-техникавий ҳамкорлик бўйича Ҳукуматлараро комиссиянинг 13-йиғилишига тайёргарлик кўриш масалаларини, хусусан, тадбирни амалий мазмун билан тўлдиришни муҳокама қилган.

Алоҳида тартибда ҳудудлараро ҳамкорликни, хусусан, Ўзбекистоннинг Андижон вилояти ва Ҳиндистоннинг Гужарот штати ўртасида муносабатларни фаоллаштириш чора-тадбирлари ўрганилган. Бундан ташқари, инвестициявий, савдо ва маданий-гуманитар соҳаларда қўшма лойиҳалар ва дастурларни амалга оширишни назарда тутган ҳолда, Фарғона вилояти ва Харяна, Бухоро ва Ҳайдаробод, Тошкент ва Нью-Деҳли шаҳарлари ўртасида бевосита ҳамкорликни йўлга қўйиш имкониятлари кўриб чиқилган.

Мулоқотда молиявий-техник ҳамкорлик соҳасига ҳам тўхталиб ўтилган. Жумладан, томонлар Ҳиндистон «Эксимбанк»и томонидан Ўзбекистонда инфратузилмавий ривожланиш ва таълим соҳаларида устувор лойиҳаларни амалга оширишни молиялаштириш учун 448 миллион доллар миқдорида маблағлар ажратилишини олқишлаб, ушбу лойиҳаларни амалга жорий этиш борасида биргаликда ишлашга келишиб олган. Шунингдек, Ҳиндистоннинг грант маблағларини жалб қилиш режалаштирилаётган IT, соғлиқни сақлаш ва таълим соҳаларида ижтимоий йўналтирилган янги истиқболли лойиҳаларни ишлаб чиқиш бўйича ишларни жадаллаштиришга келишилган.

Хабарга кўра, Ҳиндистон Республикасининг Ўзбекистон Республикасидаги элчихонаси ва Ўзбекистон Республикаси Инвестициялар ва ташқи савдо вазирлиги ўртасида «Республика илмий ихтисослаштирилган аллергология марказида янги метрологик лабораторияни ташкил қилиш ва жиҳозлаш» ҳамда «Ўзбекистоннинг Сирдарё вилоятидаги умумтаълим мактабларини компьютер техникаси билан жиҳозлаш» лойиҳаларини амалга ошириш учун грант маблағларини ажратиш бўйича ўзаро англашув меморандумлари имзоланган.

Аввалроқ Абу–Даби шаҳрида Ўзбекистон инвестициялар ва ташқи савдо вазири Сардор Умурзоқов БАА бош вазирининг ўринбосари, Президент ишлари бўйича вазир Шайх Мансур бин Зоид Ол Наҳаён билан учрашгани ҳамда икки ўртада ҳамкорликни янада кенгайтиришнинг устувор йўналишлари белгилаб олингани ҳақида хабар берилганди.