Ҳиндистон ва Россия миллий валюталарда (рупий ва рубль) савдо ҳисоб-китоблари механизмини яратиш масаласини кўриб чиқмоқда, Бу ҳақда Mint газетаси Ҳиндистон ҳукуматидаги манбаларга таяниб хабар бермоқда.

Маълум қилинишича, бундай савдо механизми ҳинд экспортчиларига Россияга маҳсулот етказиб бериш учун доллар ёки еврода эмас, балки рупийда тўлаш имконини беради.

Бундай шартномага кўра, Россия банки Ҳиндистон банкида, ҳинд банки эса Россияда ҳисоб очиши керак бўлади. Келишувда қайси банклар иштирок этиши ҳозирча номаълум. Манбалардан бири бошланғич нуқта сифатида учинчи валютани, масалан, юанни олиш мумкинлигини маълум қилди.

Унинг қўшимча қилишича, алмашинув курсини ҳеч қандай валютага боғлашга ҳожат қолмайди. Келишув доирасида Россия валютаси рупийга конвертация қилинади ва пул Ҳиндистон банкидаги ҳисоб рақамига ўтказилади.

Таъкидланишича, Россия томонидан рупий тўлов механизми аллақачон «кичик миқёсда», хусусан, чой каби товарлар учун қўлланилган. Шунингдек, маҳаллий валютадаги савдо механизми икки давлат учун катта аҳамиятга эга, чунки Ҳиндистон Россиядан кўплаб мудофаа ва ядровий маҳсулотлар сотиб олади ҳамда бунинг эвазига фармацевтика ва қишлоқ хўжалиги товарлари, шунингдек, машинасозлик маҳсулотларини экспорт қилади.

«Рупия ва рубль савдоси жуда фаол. Биз савдони осонлаштириш учун валюта келишуви устида ишлаяпмиз, айниқса Россиядан нефть сотиб олишни ҳам кўпайтиришни режалаштирмоқдамиз», — деди исмини ошкор этмаган ҳиндистонлик амалдорлардан бири.

Унинг қўшимча қилишича, Ҳиндистон Россия нефтини пастланган нархда сотиб олишни хоҳлайди. Таъкидланишича, Ғарб санкциялари туфайли ҳинд экспортчиларига Россияга аллақачон жўнатилган товарлар учун тахминан 500 миллион доллар миқдоридаги тўловлар блокланган.

Аввалроқ Россия компаниялари ёппасига Хитой банкларида ҳисоб рақам очишни бошлагани хабар қилинганди. Шунингдек, санкциялар туфайли Россия 300 миллиард долларлик олтин-валюта захираларидан фойдаланиш имкониятидан маҳрум бўлди.