«Ўзбекистон ипотекани қайта молиялаштириш компанияси» акциядорлик жамияти (АЖ) ўз фаолиятини давом эттирмоқда. Бу ҳақда Молия вазирлиги матбуот хизмати хабар берди.

Қайд этилишича, 2022 йилнинг 1 чорагида тижорат банклари томонидан ажратилган ипотека кредитлари 42 миллион миқдорида қайта молиялаштирилади.

Компания томонидан халқаро молия ташкилотларидан қўшимча маблағлар жалб этилиши бўйича тегишли ишлар олиб борилаётгани маълум қилинди. Шунингдек, 2022 йилнинг иккинчи ярим йиллигида ушбу маблағларни ўзлаштириш бошланиши кутилмоқда.

Таъкидланишича, айни пайтда 2022 йилнинг биринчи ярим йиллигида Молия вазирлиги ресурларини жалб этилиши назарда тутилмоқда.

Хабарга кўра, 2021 йилда компания томонидан тақдим этилган ресурслар ҳисобидан иккиламчи бозордан уй-жойлар сотиб олиш учун 1,9 триллион сўм ипотека кредитлари ажратилди. 2022 йил давомида  2,0 триллион сўм миқдорида кредитлар ажратилиши режалаштирилмоқда.

Вазирликнинг қайд этишича, 2023 йилдан бошлаб компания томонидан ипотека облигациялари чиқарилиши режалаштирилган.

Молия вазирлиги ресурслари ҳисобидан бирламчи бозордан квартиралар сотиб олиш учун 2021 йилда 5,0 триллион сўм ажратилган, 2022 йилда аҳолига кредитлар бериш учун тижорат банкларига 12,8 триллион сўм ресурслар ажратилиши назарда тутилган.