Иқтисодиёт ва молия вазирлари четдан олиб келинадиган айрим экинларни ҚҚСдан озод қилиш бўйича таклиф киритади
Президент 2022 йилда буғдой ҳосилини гектарига 70 центнердан кам бўлмаслигини таъминлаш зарурлигини кўрсатиб ўтди.
Ўзбекистонда иқтисодиёт ва молия вазирлари четдан олиб келинадиган айрим экинларни ҚҚСдан озод қилиш бўйича таклиф киритади. Бу ҳақда Президент томонидан ўтказилган видеоселектор йиғилишида маълум қилинди.
Қайд этилишича, йиғилишда жаҳон бозорларидаги ҳозирги вазиятдан келиб чиқиб, иқтисодиёт ва молия вазирларига ички қувватларни тўлиқ ишга солиш ва чорва озуқа таъминотини яхшилаш мақсадида четдан олиб келинадиган кунгабоқар, соя ва бошқа мойли экинлар бўйича божхона имтиёзларини бериш ва қўшилган қиймат солиғидан озод қилиш юзасидан таклиф киритиш топширилди.
Шунингдек, ҳар бир вилоятда маҳсулотларни сақлаш, қайта ишлаш, қуритиш, қадоқлаш бўйича кичик ва ўрта лойиҳаларга 65 миллион доллар йўналтирилиши маълум қилинди.
Президент 2022 йилда буғдой ҳосилини гектарига 70 центнердан кам бўлмаслигини таъминлаш зарурлигини кўрсатиб ўтди.
Аввалроқ Ўзбекистон Олий Мажлиси Сенати мамлакатга олиб кириладиган айрим маҳсулотларни ҚҚСдан озод қилишни кўзда тутувчи қонунни маъқуллаганди.