Ўзбекистон Суғурта бозорини ривожлантириш агентлиги томонидан «Суғурталовчи ва қайта суғурталовчининг инвестицион фаолияти тўғрисидаги низомга ўзгартиришлар ва қўшимча киритиш ҳақида»ги Молия вазирининг буйруғи лойиҳаси ишлаб чиқилди. Бу ҳақда агентлик матбуот хизмати хабар берди.

Маълум қилинишича, мазкур буйруқ лойиҳасида суғурта компанияларини капитал бозоридаги иштирокини кенгайтириш мақсадида суғурталовчи ва қайта суғурталовчиларнинг инвестиция фаолияти объектлари қаторига “қонун ҳужжатларига мувофиқ юридик шахслар томонидан чиқарилган облигациялар» жумласи киритилмоқда.

Инвестиция фаолиятини ташкил этиш бўйича мажбурият юклатилган суғурталовчининг ходимига (масъул шахс) қўйилган малака талабларини кенгайтириш мақсадида эса «ахборот технологиялари» соҳасидаги малака талаблари қўшилмоқда. Шунингдек масъул шахснинг талаб этиладиган минимал иш стажи 2 йилдан 1 йилга камайтирилмоқда.

«Суғурталовчи ва қайта суғурталовчининг инвестицион фаолияти тўғрисидаги низомга ўзгартиришлар ва қўшимча киритиш ҳақида»ги Молия вазирининг буйруғи лойиҳаси Норматив-ҳуқуқий ҳужжатлар лойиҳалари муҳокамаси порталида жамоатчилик муҳокамаси учун жойлаштирилди.

Норматив-ҳуқуқий ҳужжат лойиҳаси муҳокамаси 25 ноябргача давом этади.

Аввалроқ Автомобиль эгаларидан фуқаролик жавобгарлиги мажбурий суғурта полисини сўраш бекор қилиниши ҳақида хабар берилганди.