Google компаниясининг унумдорлик бўйича маслаҳатчиси ва Productivity Google дастури раҳбари Лаура Мэй Мартин самарадорликни ривожлантириш мумкин бўлган маҳорат деб ҳисоблайди. Бунга эришиш учун асосийси фойдали одатларни шакллантириш ва йил давомида уларни такрорлаш талаб этилади. Мэй Мартин 2022 йилда амал қилиш керак бўлган учта исботланган маслаҳат билан ўртоқлашди.

Катта ва кичик вазифалар учун вақтни бошқариш (time management)

Ҳар бир инсон прокрастинацияга (procrastination — кечиктириш, иш ва вазифаларни ортга суришга бўлган мойиллик, дангасалик) дуч келган.

Эҳтимол, бу сиз билан ҳозир ҳам содир бўлмоқда. Кечиктиришни тўхтатишнинг бир йўли:

Дастлаб, энг самарали ҳисобланган соатларни аниқлаш керак. Ким учундир бу эрталабки 8:00 ва 11:00 оралиғи ва яна ким учундир кечки 16:00дан 21:00гача бўлган вақт. Шундан сўнг, энг қийин вазифаларни айнан ўша вақт оралиғида бажаришни режалаштириш керак.

Қолган вақтда сиз унчалик муҳим бўлмаган ишларни қилишингиз ёки кўп энергия талаб этмайдиган учрашувлар ўтказишингиз мумкин.

Чалғитувчи омиллар ва олдиндан режалаштириш

Сизни иш вақтида ёки диққатни бир жойга жамлаш керак бўлганида нима чалғитиши мумкинлигини яхши биласиз. Самарадорлик учун уларни бартараф қилиш талаб этилади.

Браузерингизда ишлаш учун фақат битта ёрлиқ (tab)ни қолдиринг ва билдиришномалар (notifications)ни ўчириб қўйинг. Ушбу оддий ҳаракатлар керакли натижани беради.

Ишларни аввалдан режалаштиринг, керак бўлса махсус рўйхат тузинг. Бу сизга устувор вазифаларни аниқлашда, ишлар кетма-кетлигини шакллантириш орқали вақтни тежашда ёрдам беради.

Вақт чекланган ресурсдир. Бирор нарсага «ҳа» десангиз, бошқа нарсадан воз кечасиз, у шундай ишлайди. Иштирокингиз ихтиёрий бўлган учрашувга рози бўлсангиз, сизни қизиқтирган лойиҳага камроқ вақт қолдирасиз. Вақти-вақти билан устувор вазифаларни аниқлаб олинг ва кундалик вазифаларингизни келажакда эришмоқчи бўлган нарсаларингиз билан мувозанатлашга ҳаракат қилинг.

Иккитаси бирда

Вақтни самарали сарфлашнинг ушбу усули бекорга иккитаси бирда деб номланмаган. Унинг ўзига хослиги ҳам айнан шунда: бир вақтнинг ўзида иккита ишни бажариш керак. Масалан, сиз ҳам кечки таом тайёрлашингиз, ҳам эртанги маърузангиз матнини ёдлашингиз керак.

Шундай ҳолатда иккита вазифани бирлаштириб юбориш мумкин. Бу бироз ноқулай ва шу билан бирга кўпроқ ақлий меҳнат талаб қилиши табиий. Чунки сиз бир вақтда ҳам таом пиширишга, ҳам матн сўзларига эътибор қилишингиз талаб этилади. Бироқ бу маърузангиз сўзларини яхшироқ эслаб қолишингизга ёрдам ҳам бериши мумкин.

Яна бир мисол: айтайлик, яқинда янги бир фильм намойиш қилинди ва сизда ушбу фильмни томоша қилиш истаги бор. Бу учун алоҳида вақт ажратиш шарт эмас. Фильмни сафар вақтида, йўлда амалга оширса ҳам бўлади. Шунда сиз ҳам манзилга етасиз, ҳам маданий ҳордиқ оласиз.

Аввалроқ Google ходимлари орасида машҳур бўлган шахсий ривожланиш учун «20 фоиз қоидаси» ҳақида батафсил маълумот берилганди.