Meta бош директори Марк Цукерберг ходимлар билан виртуал учрашув ўтказди ва у ерда компаниянинг янги асосий қадриятларини эълон қилди. Бу ҳақда Business Insider хабар берди.

Маълум қилинишича, «Тез бажар» қадрияти «Биргаликда тез бажар»га ўзгартирилган. Шунингдек, «Очиқ бўл» ибораси «Келажакда яша» ҳамда «Дангал бўл ва ҳамкасбларни ҳурмат қил»га ўзгарган.

«Жасоратли бўл» — «Ажойиб нарсаларни ярат»га айланган. Бундан ташқари, янги элемент пайдо бўлган — «Узоқ муддатли натижага эътибор қарат».

Шу билан бирга, Цукерберг ходимлар ҳамкасблари билан қийин суҳбатларга тайёр бўлишлари учун «ўлимгача хушмуомала» бўлмаслиги кераклигини айтган.

Meta янги шиорга ҳам эга бўлган — «Meta, метaматрослар, мен» (Meta, metamates, me). Бу «кема, денгизчилар, мен» (Ship, shipmates, self) деган денгизчилар иборасига ишора бўлиб, кема ва экипаж биринчи ўринда бўлиши кераклиги, шундан кейингина шахснинг ўзи туришини англатади.

Цукербергнинг сўзларига кўра, шиор жамоавий муваффақият учун масъулият ҳиссини ифодалайди.

«Бу бизнинг компаниямиз ва бир-биримизга ғамхўрлик қилишимиздир», дея тушунтирган Цукерберг. Унинг қўшимча қилишича, у аллақачон бир мунча вақт давомида шиорни компания ичкарисида ишлатган.

Цукербергнинг таъкидлашича, «метаўртоқлар» атамаси машҳур физик Дуглас Хофстадтер томонидан яратилган. Унга ребрендингдан сўнг Meta ходими, Facebook Reality Labs раҳбари Эндрю Босворт ғоя сўраб хат ёзган.

Қайд этилишича, Цукербергнинг компанияси ички ҳужжатлар ошкор бўлган можародан сўнг энди оёққа турмоқда. Ҳужжатда компания фойдаланувчиларга, жумладан, вояга етмаганларга зарар етказишини билиши, лекин фойда кўриш учунгина буни сезмаганликка олишни афзал кўргани маълум қилинган.

Аввалроқ Meta ва Snap 11 ёшли қизнинг суиқасдида айблангани хабар қилинганди. Шунингдек, Цукербергнинг Meta компанияси 2021 йилнинг «энг ёмони» деб топилгани ҳақида хабар берилди.