Ўзбекистон Марказий банки томонидан меҳнат мигрантлари ва уларнинг оила аъзоларининг молиявий саводхонлигини ошириш бўйича лойиҳа амалга оширилиши бошланди. Бу ҳақда банк матбуот хизмати хабар берди.

Қайд этилишича, 24 ноябрь куни Марказий банк томонидан «Кафолат» суғурта компанияси билан биргаликда Бандлик ва меҳнат муносабатлари вазирлиги ҳузуридаги «Ишга марҳамат» мономарказлари ҳамда Ташқи меҳнат миграцияси агентлигининг 12 та вилоят, Қорақалпоғистон ва Тошкент шаҳридаги тренерларни молиявий саводхонлик бўйича тайёрлаш юзасидан тренинг ўтказилди.

Тренинг доирасида тўлов ва пул ўтказмалари, замонавий молиявий технологиялар, молиявий хавфсизлик (жумладан, рақамли молиявий хавфсизлик) ва банк омонатлари каби мавзулар ёритилган. Бундан ташқари, дастурга «Сбербанк» ОАЖ мутахассислари томонидан ишлаб чиқилган маълумотлар ва материаллар киритилган бўлиб, улар Россиянинг банк хизматлари бўйича батафсил маълумотларни очиб берган.

Лойиҳа жорий йилнинг декабрь ойидан бошлаб «Агробанк», «Микрокредитбанк» ва «Халқ банки»нинг консалтинг кўмаги остида 6 кунлик кенгайтирилган ўқув курси доирасида «Ишга марҳамат» мономарказларининг 14 та филиалларида, бир кунлик тезлаштирилган ўқув курси Ташқи меҳнат миграцияси агентлиги орқали амалга оширилиши режалаштирилган.

Аввалроқ Марказий банк вакиллари БМТ эксперти билан аҳолининг молиявий саводхонлиги бўйича фикр алмашганди.