Марказий банк пул-кредит сиёсати операцион механизми ва кўрсакичларига ўзгартиришлар киритди
Пул-кредит сиёсати операцион механизми ва кўрсакичларига ўзгартиришлар киритиш тўғрисида қарор қабул қилинди.
Ўзбекистон Марказий банки бошқарувининг 2022 йил 21 июлдаги қарори билан пул-кредит сиёсати операцион механизми ва кўрсакичларига ўзгартиришлар киритилди. Бу ҳақда регулятор матбуот хизмати хабар бермоқда.
Инфляцион таргетлаш режимига ўтган илғор хорижий мамлакатлар ва халқаро молия бозорлари тажрибасидан келиб чиқиб, пул-кредит сиёсати операцион механизмини ривожлантириш ва пул бозори кўрсаткичларининг аҳамиятини ошириш мақсадида:
- 4 августдан ликвидликни тартибга солишга қаратилган асосий операциялар — депозит аукционларининг муддати 1 ҳафтага қисқартирилади ва ҳафтада 1 маротаба ўтказилиши йўлга қўйилади;
- пул бозорига Марказий банкнинг асосий ставка ўзгартирилиши бўйича қарорларини самарали ўтказиш мақсадида умумий ликвидликни тартибга солишда 1 ҳафталик депозит аукционларининг роли ошириб борилади;
- 22 июлдан банклараро пул бозорида қисқа муддатли ресурс нархини ўзида ифода этувчи UZONIA фоиз ставкаси, UZONIA индекси ва турли муддатлар учун муддатли жамланган UZONIA фоиз ставкалари ҳисоблаб чиқилади ва эълон қилиб борилади.
Маълум қилинишича, «Ўзбекистон Республикаси Банклараро пул бозорининг UZONIA индексини (Uzbek Overnight Index Average — ўртача овернайт индекс) ҳисоблаш ва эълон қилиш Методологияси» Европа Тикланиш ва Тараққиёт банки ҳамда барча тижорат банклари иштирокида ишлаб чиқилган ва Марказий банк бошқарувининг 2022 йил 21 июлдаги йиғилишида тасдиқланган.
Аввалроқ Ўзбекистонда иқлим ўзгаришлари макроиқтисодий ривожланиш шартлари ва пул-кредит сиёсатининг асосий йўналишларини белгилашда таъсир этувчи омиллар қаторига қўшилганди.