Марказий банкда омонат хизматларини кўрсатишдаги камчиликлар кўриб чиқилди
Йиғилишда омонат шартлари ҳақидаги маълумотларни тўлиқ ва тўғри бериш мажбурийлиги таъкидланди.
Ўзбекистон Марказий банкида истеъмолчиларга омонат хизматларини кўрсатиш ҳолати таҳлил этилди. Бу ҳақда банк матбуот хизмати хабар берди.
Маълум қилинишича, Марказий банкда тижорат банкларида жисмоний шахсларга омонат хизматларини кўрсатиш ҳолати бўйича ўтказилган тематик ўрганиш натижалари юзасидан Марказий банкнинг Банк назорати қўмитаси йиғилиши ўтказилган. Унда тижорат банклари масъул ходимлари иштирок этган.
Йиғилишда ўрганиш натижаларига асосан банк муассасаларида омонатлар ва уларнинг шартлари тўғрисида истеъмолчиларга маълумотларни тақдим этишда йўл қўйилаётган камчиликлар кўриб чиқилган.
Шу жумладан, банк ходимлари томонидан омонатлар ҳақида истеъмолчиларга берилаётган маълумотлар ва банкнинг расмий веб-сайтида жойлаштирилган маълумотлар ўртасида фарқ мавжудлиги, ходимларнинг омонат хизматларини кўрсатиш бўйича етарли билим ва малакага эга эмаслиги билан боғлиқ ҳолатлар муҳокама қилинган.
Шу билан бирга, тадбирда истеъмолчига омонат шартлари ҳақидаги маълумотларни тўлиқ ва тўғри берилиши мажбурийлиги, бундай бўлмаган тақдирда истеъмолчиларнинг банк хизматлари бўйича ҳуқуқи бузилган деб ҳисобланиши қайд этиб ўтилган. Бу каби ҳолатларга йўл қўйган тижорат банкларига нисбатан «Банклар ва банк фаолияти тўғрисида»ги қонунига мувофиқ санкциялар қўлланиши мумкинлиги таъкидланган.
Йиғилиш якунида тижорат банкларига омонат хизматларини кўрсатиш бўйича мавжуд муаммоларни бартараф этиш ҳамда омонат хизматларини кўрсатиш сифатини янада яхшилаш юзасидан зарурий кўрсатма ва тавсиялар берилган.
Шунингдек, хабарда банк хизматлари истеъмолчиларига омонат хизматлари кўрсатиш сифатини ошириш бўйича ўз таклифлари юзасидан бевосита хизмат кўрсатувчи банкка ёки Марказий банкка мурожаат этиши мумкинлиги эслатилган.
Аввалроқ Ўзбекистонда янги «мақсадли ипотека омонати» механизми жорий этилиши хабар қилинганди. Шунингдек, Ўзбекистонда миллий валютада энг фойдали омонат таклиф қилаётган банклар ҳақида хабар берилди.