Maserati премьераси 2022 йилда бўлиб ўтиши кутилаётган янги Grecale кроссоверининг ҳаракатланган тизерини намойиш этди.

Италиялик автомобиль ишлаб чиқарувчиси YouTube’даги расмий каналида Швецияда синовдан ўтказилаётган янги моделнинг камуфляжли прототипи акс этган видеони эълон қилди. Лапландиянинг 30 даража совуғида автомобилнинг иқлим тизими, электрон тизимларнинг ишлаши текширилмоқда. Шунингдек, кроссовернинг ҳаракатланиш хусусиятлари созланмоқда.

Маълумотларга кўра, Maserati Grecale ишлаб чиқариш турдош Alfa Romeo моделлари ишлаб чиқариладиган Кассино шаҳридаги Stellantis заводида амалга оширилади.

Шу билан бирга, Maserati учун Европада 2021 йил жуда муваффақиятли бўлган — ҳатто эски седанлар ҳам сотувларни оширишга муваффақ бўлган. Жумладан, 2021 йили Европада 1453 та Ghibli автомобили (+45 фоиз) сотилган, Quattroporte 115 та эгасини топган (+2 фоиз), MC20 суперкари 119 нусхада сотилган. Бренднинг бестселлери 2560 дона (+18 фоиз) сотиш билан Levante кроссовери бўлиб қолмоқда.

Аввалроқ Ferrari 2 миллион евролик эксклюзив Daytona SP3 суперкарини тақдим этгани хабар қилинганди. Шунингдек, Lamborghini электромобиль ишлаб чиқаришга ўтиш учун рекорд сумма ажратгани ҳақида хабар берилди.