Маскнинг адвокатлари Twitter даъвоси бўйича суд мажлисини кейинга қолдиришни сўради

Tesla ва SpaceX асосчиси Илон Маскнинг адвокатлари Twitter’нинг тезлаштирилган суд жараёнини ўтказиш тўғрисидаги сўровини рад этишни сўраб ариза берди. Бу ҳақда Bloomberg нашри хабар бермоқда.

Twitter 13 июль куни суд орқали тадбиркордан ижтимоий тармоқни 44 миллиард долларга сотиб олишни якунлашни талаб қилиб, уни тармоқ ва унинг акциядорлари олдидаги мажбуриятларини бажармаганликда айблади.

Компания Делавэр штатининг Адолат суди ишни сентябрь ойида кўришни бошлашига ва жараён тўрт кун давом этишига умид қилмоқда.

Маскнинг адвокатлари қайд этишича, «бундай катта миқёсдаги ишни» бунчалик қисқа вақт ичида якунлаб бўлмайди.

«Twitter жараёнларни ‘ёруғлик тезлигида’ ўтказа олмайди», — дейди улар.

Tesla раҳбарининг вакиллари суд жараёнини 2023 йил 13 февралда ўтказишни сўрамоқда.

«19 июль куни суд ишини тезлаштирилган режимда кўриб чиқиш керакми ёки йўқлиги борасида тингловлар бўлиб ўтади», деб ёзади Bloomberg.

The Washington Post нашрининг ёзишича, Маскнинг адвокатлари тадбиркор келишувдан воз кечиш ҳуқуқига эга деб ҳисобламоқда, уларнинг фикрича, Twitter Маскка бизнесни баҳолаш учун зарур бўлган тўлиқ маълумотлар — спам-ботлар ва сохта аккаунтлар ҳақидаги информацияларни тақдим этмаган.

Маскнинг сўзларига кўра, Twitter «ҳақиқатни яширишга» уринган.

«Тадбиркор тармоқдан спам-ботлар ва сохта аккаунтлар қайдини қандай юритаётгани ҳақида қўшимча маълумот олишга уринган, аммо бу муваффақиятсиз якунланган», деб ёзади The New York Times Маск адвокатларига таяниб.

Аввалроқ Илон Маскнинг жамоаси Twitter ижтимоий тармоғини сотиб олишини молиялаштириш бўйича инвесторлар билан ўтказилаётган музокараларни тўхтатган, кейинроқ эса сотиб олиш фикридан бутунлай қайтганди.

Маскнинг таъкидлашича, Twitter’нинг сохта ва спам аккаунтлар умумий фойдаланувчилар сонининг беш фоиздан камроғини ташкил қилиши ҳақидаги даъволари ҳақиқатга тўғри келмайди.

Twitter раҳбарияти SpaceX ва Tesla асосчиси Илон Маскни ижтимоий тармоқни сотиб олишдан бош тортгани учун судга мурожаат қилишини маълум қилганди.

Илон Маск Twitter’ни сотиб олиш фикридан қайтганидан сўнг тармоқ акциялари ўн бир фоизга тушиб кетди.