МИБ қарздорлиги туфайли 3 мингдан ортиқ фуқаро қидирувдалигини маълум қилди
Қидирилаётганларнинг 1115 нафари чет элга чиқиб кетган
Ўзбекистонда Мажбурий ижро бюроси томонидан 3000 нафардан кўпроқ қарздор изланяпти. Бу ҳақда АОКАда ўтказилган брифингда бюронинг матбуот хизмати раҳбари Фаррух Тошпўлатов маълум қилди.
Хабар берилишича, Мажбурий ижро бюросининг тезкор-қидирув фаолияти натижасида 2021 йилнинг ўтган даврида қарздорлиги туфайли 7800 дан зиёд жисмоний шахсга нисбатан қидирув эълон қилинган бўлиб, шундан 4,5 мингдан (58 фоиз) ортиғи топилиб, мажбурий ижро ҳаракатлари ўтказилган.
Қайд этилишича, бюро томонидан 3264 нафар қарздор қидириляпти. Уларнинг 2149 нафари республика ҳудудида яширинган, 1115 нафари эса чет элга чиқиб кетган.
Шу билан бирга, қидирувдаги шахслар топилиши натижасида қарздорлардан жами 30 миллиард 700 миллион сўм ундирилган. Шундан 22 миллиард 800 миллион сўми алимент пуллари ҳисобланади.
Аввалроқ Ўзбекистонда бюджет тақчиллиги 2022 йил 25 триллион сўмдан ортиши кутилаётгани хабар қилинганди. Шунингдек, «Халқ банки» 3 триллион сўм зарарга киргани ҳақида хабар берилди.