Миллиардер Роман Абрамовичнинг самолёти сотувга қўйилди
Самолёт 34 нафаргача йўловчини сиғдира олади
Роман Абрамовичга тегишли P4-MES рақамига эга Boeing 767-300ER самолёти сотувга қўйилди. Бу ҳақда Forbes’нинг авиация бозоридаги икки манбаси маълум қилди.
Маълум қилинишича, самолёт Global Jet Monaco SAM оператори томонидан сотилади. Forbes манбасига кўра, лотнинг тахминий қиймати 100 миллион долларни ташкил этади. Самолёт 2003 йилда ишлаб чиқарилган ва 2007 йилда фойдаланишга топширилган. Нашр манбасига кўра, кейинчалик у эгасига 315 миллион долларга тушган.
Самолёт ўқув зали, меҳмонлар учун 3 кишилик ётоқхона, ошхона ва меҳмонхона билан жиҳозланган. Boeing 767-300ER’нинг парвоз масофаси 11 300 километрни ташкил этади. Самолёт споттерлар (самолётларни суратга олиш ишқибозлари) орасида кокпит ёнидаги қора кўзойнакни эслатувчи қора чизиқ сабабли «Бандит» лақабини олган.
Хабарга кўра, самолёт 34 нафаргача йўловчини сиғдира олади.
Аввалроқ асли бухоролик миллиардер Искандар Маҳмудов Россиянинг энг катта олтин қазиб олувчиларидан бирини сотиб олиши ҳақида хабар берилганди.