Миллий банк Москва биржасига 10 млрд рубллик облигация жойлаштиради
Биржа Ўзбекистоннинг яна бир қанча эмитентлари билан облигацияларни Мосбиржда жойлаштириш бўйича музокаралар олиб бормоқда
Москва биржаси Ўзбекистоннинг бир қанча эмитентлари билан Россияда облигацияларни жойлаштириш бўйича музокаралар олиб бормоқда. Бу ҳақда Москва биржасининг эмитентлар ва ҳокимият органлари билан алоқалар бўйича бошқарувчи директори Владимир Гусаков маълум қилди.
Унинг таъкидлашича, Ўзбекистондаги энг йирик тижорат банки бўлган Миллий банк Москва биржасига 10 миллиард рубль миқдоридаги дебют облигацияларини жойлаштиришга тайёргарлик кўрмоқда.
Гусаковнинг сўзларига кўра, биржа Ўзбекистоннинг яна бир қанча эмитентлари билан облигацияларни Мосбиржда жойлаштириш бўйича музокаралар олиб бормоқда.
«Умид қиламанки, 2022 йилда биз Москва биржасида яна бир қанча Ўзбекистон эмитентларини кўрамиз», — деди директор Россия ва Ўзбекистонда капитал бозорларини ривожлантириш ва уларнинг эмитентлар учун имкониятларига бағишланган давра суҳбатида.
«Газпромбанк» капитал бозори блокининг ижрочи директори Наталья Яценконинг айтишича, айни пайтда бенчмарк ҳажми кўриб чиқилмоқда — тахминан 10 миллиард рубль. Шартларга кўра, булар дебютни жойлаштириш бозори учун ҳозирда қулай бўлган шартларда, яъни уч йилдан беш йилгача бўлади.
Аввалроқ «Ўзбекнефтгаз» Лондон фонд биржасига 700 млн долларгача еврооблигациялар чиқариши ҳақида хабар берилганди.
