Ўзбекистон бюджети дефицити 2021 йилги 5,5–6 фоиздан 3 фоизга туширилади. Бу ҳақда молия вазири Тимур Ишметов «Ўзбекистон 24» телеканалига айтиб ўтди.

Молия вазирининг таъкидлашича, 2022 йилдан консолидациялашган бюджет дефицитини бу йилги 5,5–6 фоиздан 3 фоизга тушириш ва кейинги йиллардан кўрсаткични бу лимитдан умуман оширмаслик кўзда тутилмоқда.

«Президентимиз ҳузурида  бўлиб ўтган мажлисда йил якунлари бўйича ва асосан кейинги йилга макроиқтисодий кўрсаткичлар ва бюджет параметрлари масалалари муҳокама қилинди. Мажлисда Молия вазирлигига бир қатор топшириқлар берилди. Буларнинг биринчиси — кейинги йилдан бошлаб бюджет макроиқтисодий барқарорлигини таъминлаш мақсадида консолидациялашган давлат бюджети дефицитини бу йилги 5,5–6 фоиздан кейинги йил 3 фоизгача тушириш ва шу миқдорда ушлаб туриш», — дейди Ишметов.

Вазирнинг айтишича, ҳаттоки қонун билан бюджет дефицитига лимит ўрнатиш ва шу билан бирга кейинги йиллардан дефицитни 3 фоиздан оширмаслик бўйича қатъий топшириқ берилган.

«Бундан буёғига кейинги Молия вазирлиги ва Ҳисоб палатаси билан бирга ҳар бир ажратилган пулни ҳақиқатан ҳам амалда жойига етиб боргани ҳамда бу ишларга ишлатилган пул шу вазирлик томонидан эълон қилинган мақсадларга, аниқроғи кўрсаткичларга эришилгани бўйича назорат тизими яратилади», — дея қўшимча қилди у.

Аввалроқ Ўзбекистонда инфляция октябрь ойида йиллик 10,6 фоизни ташкил қилгани хабар қилинганди.