Молия вазирлиги вакиллари Австрия банклари билан кредит масалаларини муҳокама қилди
Маҳаллий соғлиқни сақлаш тизимини ислоҳ қилиш бўйича АМЕ International билан ҳамкорлик қилиниши мумкин
Ўзбекистон Молия вазирлигида Австрия бизнес делегацияси таркибига кирувчи қатор компанияларнинг раҳбарияти вакиллари билан учрашув бўлиб ўтди. Бу ҳақда вазирлик матбуот хизмати хабар берди.
Маълум қилинишича, учрашувда вазирлик номидан вазир ўринбосари Одилбек Исҳоқов, давлат қарзи департаменти директори Жасур Қаршибоев, капитал бозорини ривожлантириш департаменти директори Сарвар Аҳмадов, Давлат-хусусий шерикликни ривожлантириш агентлиги директори ўринбосари Нодир Нуриддинов ва Давлат қарзи департаменти директори ўринбосари Беҳруз Каримов иштирок этган.
Қайд этилишича, ташриф буюрган компаниялар орасида UniCredit Bank Austria, AME International, RIEF Financial communications, Advantage Austria, bit media e-solutions ва бошқалар бор. Делегация вакилларига хусусий секторни ривожлантириш бўйича амалга оширилаётган ишлар ҳамда давлат объектларини давлат ва бизнесга сотиш, бирламчи (ИПО) ва иккиламчи (СПО) фонд биржасида акцияларни оммавий таклиф этиш бўйича маълумот берилган.
Томонлар электрон ҳукумат ва рақамли ечимлар, капитал бозори ва хусусийлаштириш, овозли алоқа ва маълумотлар узатиш тизимлари соҳасидаги лойиҳаларни биргаликда ишлаб чиқиш борасида муҳокама қилишган. Бундан ташқари, маҳаллий соғлиқни сақлашни ислоҳ қилиш, шу жумладан рақамли, хорижий тиббий ноу-ҳауни жорий етиш ва аҳолига кардиологик ёрдамни такомиллаштиришга кўмаклашувчи АМЕ International билан ҳамкорлик қилиш бўйича имкониятлари кўриб чиқилган.
Таъкидланишича, давлат-хусусий шериклик асосидаги соғлиқни сақлаш,таълим, йўл қурилиши ва бошқа лойиҳаларга инвестицияларни жалб этиш имкониятларига алоҳида эътибор қаратилмоқда. Жумладан, Австрия компаниялари ва банклари иштирокида амалга оширилаётган лойиҳалар масалалари ҳамда ривожланаётган лойиҳалар учун Австрия банкларидан кредитларни жалб қилишнинг кейинги босқичлари ва шартлари муҳокама қилинган.
Шунингдек, учрашув якунида томонлар яқин ҳамкорлик ва томонларни қизиқтирган соҳаларда тажриба алмашиш имкониятларини ўрганишга келишиб олган.
Аввалроқ Тошкентда Ўзбекистон ва Австрия ишбилармонлари ўртасида бизнес-форум ўтказилгани хабар қилинганди. Шунингдек, Сардор Умурзоқов Австриянинг Европа ва ташқи федерал вазирини қабул қилгани ҳақида хабар берилди.