Олмаота халқаро аэропорти 13 январь куни ишини қайта тиклайди. Бу ҳақда Қозоғистон фуқаро авиацияси қўмитаси хабар берди.

«Аэропорт раҳбариятининг дастлабки маълумотларига кўра, ички ва халқаро рейслар авиакомпаниянинг парвозлар жадвали вақтига кўра, соат 8.00 дан 21.00 гача амалга оширилади», дейилади хабарда.

Қайд этилишича, Олмаота маъмурияти олдинроқ аэропорт 19 январгача жорий этилган фавқулодда ҳолат муддати тугагунча ишламаслигини маълум қилган. Кейинроқ ҳокимлик бу хабарни хато деб атаган ва узр сўраган.

Хабарга кўра, 6 январь куни аэропорт ёпилган. Тартибсизликлар пайтида одамлар аэропортга босқинчилик уюштирган, интернет узилиши ҳам корхона ишини қийинлаштирган.

Шунингдек, КХШТ тинчликпарвар кучлари Қозоғистон хавфсизлик кучларига аэропорт устидан назоратни тиклашга ёрдам берган. Кейин аэропорт россиялик ҳарбийлар томонидан қўриқланаётгани ва назоратга олингани маълум қилинган.

Таъкидланишича, 6 январдан бери аэропортнинг қайта тиклангани ҳақида мунтазам хабарлар келиб тушаётганди, бироқ ҳар сафар бу саналар кейинга сурилиб келинган. Аэропорт ҳарбий транспорт самолётларини, шу жумладан экспорт парвозларини қабул қилмоқда ва жўнатмоқда.

Бундан ташқари, 11 январь куни Қозоғистон президенти Қосим-Жўмарт Тўқаев тинчликпарвар кучларнинг мамлакатдаги миссияси якунлангани, уларни олиб чиқиш икки кундан кейин бошланишини айтган. Шундан сўнг Россия мудофаа вазири Сергей Шойгу КХШТ тинчликпарвар контингенти мамлакатдаги вазият тўлиқ барқарорлаштирилгунга қадар Қозоғистонда қолишини таъкидлаган.

Аввалроқ Uzbekistan Airways Олмаота ва Оқтўбега парвозларни бекор қилгани ҳақида хабар берилганди. Шунингдек, Россиялик миллиардер тартибсизликлар пайти Қозоғистонда қолиб кетгани хабар қилинди.