Ўзбекистоннинг 2021 йил 5 ноябрдаги қонуни билан «2021 йил учун Ўзбекистон Республикасининг Давлат бюджети тўғрисида»ги қонунга ўзгартиришлар киритилди. Бу ҳақда Norma нашри ёзмоқда.

Маълум қилинишича, давлат мақсадли жамғармалари ҳамда Тикланиш ва тараққиёт жамғармасининг даромадлари ва харажатлари прогнозига ўзгартиришлар киритилган. Тикланиш ва тараққиёт жамғармасининг харажатлари 24 239 490 миллион сўмни ташкил этади. Давлат мақсадли жамғармаларининг харажатлари 41 226 950,3 миллион сўмни ташкил этади, улар орасида қуйидаги харажатлар мавжуд:

• Вазирлар Маҳкамаси ҳузуридаги Давлат ва жамият эҳтиёжлари учун ер участкаларининг олиб қўйилиши муносабати билан жисмоний ва юридик шахсларга етказилган зарарларни қоплаш бўйича марказлаштирилган жамғарма харажатлари — 273 000 миллион сўм;
• Бандлик ва меҳнат муносабатлари вазирлиги ҳузуридаги Бандликка кўмаклашиш давлат жамғармаси харажатлари — 759 000 миллион сўм;
• ХТВ ҳузуридаги бюджетдан ташқари республика мақсадли китоб жамғармаси харажатлари — 208 752,3 миллион сўм.

Давлат мақсадли жамғармаларининг даромадлари прогнози 27 999 898,6 миллион сўмни ташкил этади.

Шунингдек, республика бюджетидан биринчи даражали бюджет маблағларини тақсимловчиларга ажратиладиган маблағларнинг чекланган миқдорларига ўзгартиришлар киритилди. Республика бюджетидан уларга жами 160 616 670,5 миллион сўм ажратилади.

Ҳужжат қонун ҳужжатлари маълумотлари миллий базасида эълон қилинган ва 6 ноябрдан кучга кирди.

Аввалроқ Шавкат Мирзиёев Ўзбекистон аҳоли даромадлари ўртачадан юқори бўлган давлатлар қаторига чиқишини айтганди.