Ўзбекистон Президентининг «Маданият ва санъатни ривожлантиришни қўллаб-қувватлаш тизимини янада такомиллаштириш тўғрисида»ги қарори қабул қилинди. Бу ҳақда Norma хабар берди.

Маълум қилинишича, ҳужжатга асосан Маданият вазирлиги ҳузуридаги Маданият ва санъатни ривожлантириш жамғармаси амалдаги молиялаштириш тартиби ва штатлар сони сақланган ҳолда Вазирлар Маҳкамаси ҳузуридаги Маданият ва санъатни ривожлантириш жамғармаси  этиб қайта ташкил қилинган.

Қайд этилишича, жамғарма Вазирлар Маҳкамасининг Туризм, спорт, маданият ва оммавий коммуникациялар масалалари котибияти таркибига киритилган. Шунингдек, жамғарманинг асосий вазифалари илгаридагидек қолдирилган.

Жумладан, маданият ва санъат соҳасини янада ривожлантиришга кўмаклашиш, шунингдек, маданият арбобларини ҳамда тасвирий санъат, адабиёт, театр, мусиқа ва хореография соҳаларида уларнинг ташаббуси билан ташкил этиладиган тадбирларни ҳар томонлама қўллаб-қувватлаш жамғарманинг вазифаларидан саналади.

Шу билан бирга, халқаро ва давлатлараро маданий алоқаларни кенгайтириш, маданият ва санъат соҳасида халқаро маданий ташкилотлар ва хайрия жамғармалари билан ҳамкорликни ривожлантириш, хорижий сармоя ва грантларни жалб этиш, мамлакатимизда маданият ва санъатга доир ҳомийликни ривожлантиришга кўмаклашиш ҳам асосий вазифалар қаторидан жой олган.

Бундан ташқари, жамғарманинг яна бир вазифаси маданиятлараро ижодий мулоқотни йўлга қўйиш ва ўзбек санъатининг жаҳон бадиий ва маданий маконига интеграциялашувига кўмаклашиш, шунингдек, мамлакатимизнинг маданий ва илмий-техник салоҳияти ҳамда рақобатбардошлиги билан боғлиқ жиҳатларни намойиш этишдир.

Шунингдек, маданият ва санъат соҳасида кадрларни тайёрлаш, қайта тайёрлаш ва уларнинг малакасини ошириш тизимини такомиллаштириш, шу билан бирга, маданият ва санъат муассасаларини зарур адабиётлар ва даврий нашрлар билан таъминлаш ҳам жамғарма вазифаси этиб белгиланган.

Таъкидланишича, жамғарма маблағларини шакллантиришнинг бир қанча манбалари келтирилган. Булар қаторига Вазирлар Маҳкамасининг ҳужжатлари (шу жумладан баённома қарорларига) асосан ажратиладиган республика бюджети маблағлари киради.

Шунингдек, жамғарманинг вақтинча бўш маблағларини молия ташкилотларида жойлаштиришдан олинган даромадлар, юридик ва жисмоний шахсларнинг ҳамда халқаро ташкилотларнинг ҳомийлик хайриялари, меценатлик кўмаги, грантлари ва қонунчилик ҳужжатларида тақиқланмаган бошқа манбалар ҳам шулар жумласидан.

Аввалроқ Кинематография агентлиги ВГИКга ўқишга кириш учун танлов эълон қилгани ҳақида хабар берилганди.