Ўзбекистонда 2022 йил ялпи ички маҳсулотнинг 6 фоиз ўсиши прогноз қилинган. Бу ҳақда Молия вазирлиги томонидан эълон ққилинган «2022 йил учун Ўзбекистон Республикасининг Давлат бюджети тўғрисида»ги қонун лойиҳасида сўз боради.

Унга кўра, ялпи ички маҳсулотнинг кўзланган ўсиш суръатлари саноатда ишлаб чиқаришни 7 фоизга, хизматлар соҳасида 6,5 фоизга, қишлоқ хўжалигида 3,3 фоизга ўсиши ҳисобига таъминланиши прогноз қилинмоқда.

Инфляция даражасининг пасайиш тенденцияси давом этиб, 2022 йилда инфляция даражаси 9 фоиз атрофида бўлиши кутилмоқда. Мазкур ривожланиш кўрсаткичларига ҳар бир соҳада бошланган таркибий ислоҳотларни сифатли давом эттириш орқали эришиш мақсад қилинган.

Ўзбекистоннинг ўрта муддатга мўлжалланган бюджет сиёсати мамлакатни ижтимоий-иктисодий ривожлантиришнинг устувор йўналишларига мувофиқ равишда амалга оширилиши кўзда тутилган.

Аввлароқ Ҳисоб палатаси томонидан тақдим этилган хулосада Ўзбекистонда ЯИМ ҳажми 74 миллиард доллардан ошиши прогноз қилинганди.