Ўзбекистонда 6 та хусусий бандлик агентлигининг лицензияси вақтинча тўхтатилди
Лицензияларнинг тўхтатилишига БҲМнинг 8500 баравари миқдоридаги захира маблағлари тўлдирилмагани сабаб бўлган.
Ўзбекистон Бандлик ва меҳнат муносабатлари вазирлиги томонидан 6 та хусусий бандлик агентлигининг лицензияси вақтинча тўхтатилди. Бу ҳақда вазирлик матбуот хизмати хабар берди.
Маълум қилинишича, Бандлик ва меҳнат муносабатлари вазирлигининг 2021 йил 7 декабрдаги тегишли қарорлари билан Хорижда меҳнат фаолиятини амалга оширувчи фуқароларни қўллаб-қувватлаш ҳамда уларнинг ҳуқуқ ва манфаатларини ҳимоя қилиш жамғармасида БҲМнинг 8500 баравари миқдоридаги маблағларни захира сифатида тўлдирмагани сабабли бир қанча хусусий бандлик агентликларининг лицензиялари вақтинча тўхтатилган.
Қайд этилишича, қуйидаги хусусий бандлик агентликларининг лицензиялари 10 кун муддатга вақтинча тўхтатилган:
- «Mirai recruitment agency xусусий бандлик агентлиги» МЧЖ;
- «Reiwa хусусий бандлик агентлиги» МЧЖ;
- «Турон wорлд cооператион хусусий бандлик агентлиги» МЧЖ;
- «Priority international хусусий бандлик агентлиги» МЧЖ;
- «Specialist group хусусий бандлик агентлиги» МЧЖ;
- «Jyonan-staff Business хусусий бандлик агентлиги» МЧЖ.
Аввалроқ Ўзбекистонда ишсизлик даражаси маълум бўлгани хабар қилинганди.
