Ўзбекистонда апрель ойида аҳоли томонидан сезилган инфляция пасаювчи динамика кўрсатди. Бу ҳақда Марказий банк маълумот берди.

Таъкидланишича, 2022 йилнинг апрель ойида ўтказилган сўров натижаларига кўра, респондентлар томонидан сезилган инфляция пасаювчи динамика кўрсатиб, 14,6 фоизни ташкил этган бўлса, жавобларнинг медиана қиймати 11,4 фоиз атрофида шаклланди.

Шу билан бирга, умумий жавоб берувчилар таркибида сезилган инфляцияни 9-12 фоиз атрофида ҳис қилган респондентлар сони кўпчиликни ташкил қилди. Жавобларнинг мода кўрсаткичи ҳам март ойига нисбатан пасаювчи динамика кўрсатди.

Респондентларнинг кўпчилик қисми апрель ойида ўсимлик ёғи, шакар ва қандолат маҳсулотлари ҳамда нон ва ун маҳсулотлари қимматлаганини сезган бўлса, ичимликлар, дуккакли маҳсулотлар ҳамда алоқа ва интернет нархи бироз ошганини таъкидлаган. 

Фаолият соҳалари бўйича умумий овқатланиш, қурилиш, ишлаб чиқариш, қишлоқ хўжалиги ҳамда тиббиёт соҳаларида фаолият юритаётган респондентлар томонидан сезилган инфляция даражаси бошқа соҳа вакилларига нисбатан юқорироқ шаклланди.

Сезилган инфляциянинг нисбатан юқори кўрсаткичлари Бухоро, Наманган ҳамда Хоразм вилоятларида кузатилган бўлса, нисбатан паст кўрсаткичлар Сурхондарё ва Андижон вилоятларида қайд этилди.