Ўзбекистон Олий Мажлиси Қонунчилик палатасининг навбатдаги мажлисида депутатлар томонидан «Ўзбекистон Республикаси бюджет тизимини кўриб чиқиш тартиби такомиллаштирилиши муносабати билан Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида»ги қонун лойиҳаси биринчи ўқишда кўриб чиқилди. Бу ҳақда қуйи палата матбуот хизмати хабар берди.

Маълум қилинишича, қонун лойиҳаси билан Бюджет кодексига, «Маҳаллий давлат ҳокимияти тўғрисида»ги, «Ўзбекистон Республикасининг Ҳисоб палатаси тўғрисида»ги қонунларига ўзгартиш ва қўшимчалар киритиш таклиф этилмоқда.

Таъкидланишича, Давлат бюджети тўғрисидаги қонунга ва Қорақалпоғистон Жўқорғи Кенгеси, халқ депутатлари, вилоятлар ва Тошкент шаҳри Кенгашларининг маҳаллий бюджетларига ўзгартириш киритишни Ҳисоб палатаси хулосаси асосида амалга ошириш тартиби жорий қилинмоқда.

Яъни, келгусида Давлат бюджети тўғрисидаги қонунга ўзгартириш киритилган тақдирда дастлаб қонун лойиҳасига Ҳисоб палатасининг хулосаси олинганидан сўнг Қонунчилик палатасига киритиш мумкин бўлади. Шунингдек, маҳаллий бюджетлар Ҳисоб палатаси томонидан ташқи аудитдан ўтказилиб, ҳар йили 1 мартгача тегишли хулосани маҳаллий ҳокимликларга тақдим этиш тартибини жорий қилиш таклиф қилинмоқда.

Бундан ташқари, қонун лойиҳаси билан Давлат солиқ қўмитаси ҳамда Давлат божхона қўмитаси солиқ ва божхона имтиёзлари рўйхатини, тақдим этилган солиқ ва божхона имтиёзларининг миқдори тўғрисидаги маълумотларни солиқ тўловчилар кесимида ўз расмий веб-сайтларига белгиланган муддатларда узлуксиз жойлаштириб бориш назарда тутилмоқда.

Қорақалпоғистон Вазирлар Кенгаши, вилоятлар ва Тошкент шаҳар, туман ва шаҳарлар ҳокимликлари томонидан тегишли бюджетларда шаклланган қўшимча маблағларнинг сарфланиши тўғрисидаги қарори (фармойиши) қабул қилинганидан сўнг уч иш куни ичида ўзларининг расмий веб-сайтларида ҳамда «Очиқ бюджет» ахборот порталига жойлаштириш мажбуриятлари белгиланмоқда.

Мажлисда қонун лойиҳаси депутатлар томонидан қабул қилинган.

Аввалроқ Ўзбекистонда бюджет маблағларини талон-торож қилганлик учун жавобгарлик кучайтирилиши хабар қилинганди. Шунингдек, Ҳисоб палатаси 2022 йилги давлат бюджети юзасидан хулосасини эълон қилгани ҳақида хабар берилди