Ўзбекистонда давлат қарзининг йиллик миқдорига чеклов ўрнатилади. Бу ҳақда Ўзбекистоннинг 2022–2026 йилларга мўлжалланган тараққиёт стратегияси лойиҳасида сўз боради.

Қайд этилишича, давлат қарзини бошқаришда йилига янги жалб қилинган ташқи қарз миқдори 4,5 миллиард доллардан ошиб кетмаслигини таъминлаш режалаштирилмоқда.

Шунингдек, ўрта муддатли давр учун фискал стратегия доирасида давлат қарзини бошқариш стратегияси ишлаб чиқилади.

Бунда:

• давлат қарзининг жорий ҳолати ва кўп прогноз сценарийлари орқали ўрта муддатда давлат қарзини ялпи ички маҳсулотга нисбатан 60 фоиз даражасидан ошмаслик чоралари;
• давлат қарзи портфелининг структурасида фоиз хатарларни самарали бошқариш чоралари назарда тутилади.

Маълумот учун, Ўзбекистоннинг умумий ташқи қарзи 2021 йилнинг бошига нисбатан 11 фоизга ёки 3,7 миллиард долларга ошиб, 2021 йил 1 октябрь ҳолатига 37,6 миллиард долларни (2021 йилнинг 1 январь ҳолатига 33,8 миллиард доллар) ташкил қилган. Шунингдек, давлат қарзи қолдиғи 2021 йилнинг III чорагида 1,1 миллиард долларга (йил бошидан 2,1 миллиард долларга) ошиб, 2021 йилнинг 1 октябрь ҳолатига 25,3 миллиард долларни ташкил этган.

Аввалроқ Ўзбекистонда давлат қарзи суммасининг ЯИМнинг 60 фоизидан ошмаслигини белгиловчи қонун лойиҳаси депутатлар томонидан муҳокама қилинганди.

Ўзбекистоннинг умумий давлат қарзи 2022 йил якунига 33,5 миллиард доллар (ЯИМга нисбатан 45,2 фоиз) га етиши прогноз қилинмоқда.