Ўзбекистонда 2022 йил доллар курси 11 321 сўмгача кўтарилиши мумкин. Бу ҳақда Ҳисоб палатасининг 2022 йилги давлат бюджети юзасидан берган хулосасида сўз боради.

Маълум қилинишича, 2022 йил учун давлат бюджети даромадларининг прогнози бюджет даромадларига сезиларли таъсир кўрсатувчи нарх ва валюта курсларининг ўртача миқдорлари асосида ҳисоб-китоб қилинган.

Жумладан, прогнозларда 1 АҚШ долларининг ўртача йиллик суммаси 11 321 сўмга етиши башорат қилинмоқда. Шунингдек, стратегик маҳсулотларнинг нархлари 1 троя унция олтин нархи — 1700 доллар, кумушнинг нархи — 25 доллар, миснинг 1 тоннасига 8500 доллар, 1000 метр/куб табиий газнинг экспорт нархи — 100 доллар бўлиши кутилмоқда.

Шунингдек, 2022 йилда импорт ҳажмининг, айниқса акциз солиғининг бекор қилиниши натижасида халқ истеъмол товарлари импорт ҳажмини кичик даражада ошиши, даромадларнинг салмоқли қисмини ташкил қилувчи асосий маҳсулотлар ва акциз солиғига тортиладиган товарларнинг ишлаб чиқариш ҳажмларининг ошиши, иш ҳақи миқдорларининг ялпи ички маҳсулоти номинал ўсишига мос равишда ўсиши ҳамда табиий газ экспортининг ошиши ва экспорт нархларининг сақланиб қолиши каби кўрсаткичлар инобатга олинган.

Аввалроқ Ҳисоб палатаси 2022 йилги давлат бюджети юзасидан хулосасини эълон қилганди.