Ўзбекистон Вазирлар Маҳкамасининг «Комплекс тадбиркорлик лицензияси (франшизинг) шартномаларини давлат рўйхатидан ўтказиш бўйича давлат хизмати кўрсатишнинг маъмурий регламентини тасдиқлаш тўғрисида»ги қарори лойиҳаси муҳокамага қўйилди.

Қарор лойиҳаси Президентнинг «Аҳолига давлат хизматлари кўрсатишнинг миллий тизимини тубдан ислоҳ қилиш чора-тадбирлари тўғрисида» 2017 йил 12 декабрдаги фармонига мувофиқ ишлаб чиқилган.

Лойиҳа билан франшизинг тўғрисидаги шартномани давлат рўйхатидан ўтказиш, франшизинг тўғрисидаги шартномаларга ўзгартириш, қўшимчалар киритиш ёки уларни бекор қилиш Давлат хизматлари марказлари томонидан тадбиркорлик субъектларини давлат рўйхатидан ўтказиш ва ҳисобга қўйишнинг автоматлаштирилган тизими орқали амалга оширилиши белгиланмоқда.

Бунда, хизмат кўрсатиш муддати 3 иш кунидан 2 иш кунига қисқартирилиб, қоғоз кўринишида журналлар юритиш қоидаси ва шу билан боғлиқ рўйхатдан ўтказувчи органлар ўртасидаги ортиқча ҳужжат алмашинуви бўйича тартиботлар бекор қилинмоқда. Лойиҳанинг қабул қилиниши оқибатида франшизинг шартномаларини давлат рўйхатидан ўтказиш электрон кўринишга ўтказилган ҳолда сезиларли соддалаштирилади.

Электрон тизимда хизмат кўрсатиш натижасида республика бўйича рўйхатдан ўтказилган барча франшизинг шартномаларининг онлайн базаси шаклланади.  Республика ҳудуди бўйлаб фаолият юритаётган ҳар қандай савдо (ишлаб чиқариш, хизмат кўрсатиш) объектларининг франшизинг шартномаси мавжуд ёки мавжуд эмаслиги бўйича реал вақт режимида текшириш имкони пайдо бўлади.

Рўйхатдан ўтказиш жараёнининг оммалаштирилиши қонунчилик ҳужжатларининг талаблари бажарилишига ва ҳуқуқий ҳимоя механизми кучайиши оқибатида чет эл инвестициялари жалб қилиш даражаси ортишига хизмат қилади. Мазкур лойиҳанинг қабул қилиниши Ўзбекистон давлат бюджетидан қўшимча маблағларни талаб этмайди.

Аввалроқ тижорат банкларида активлар сифатини таснифлаш бўйича қарор лойиҳаси муҳокамага қўйилганди.