Ўзбекистонда 2021 йилнинг январь-сентябрь ойларида ишсизлик даражаси 9,4 фоизни ташкил этиб, 2020 йилнинг шу даврига нисбатан 1,7 фоизга, январь-июнь ойларига нисбатан 0,4 фоизга камайди. Бу ҳақда Меҳнат вазирлиги матбуот хизмати хабар берди.

Маълум қилинишича, 2021 йилнинг сентябрь ойида Бандлик ва меҳнат муносабатлари вазирлигининг Республика аҳоли бандлиги ва меҳнатни муҳофаза қилиш илмий маркази томонидан Ўзбекистоннинг 108 та шаҳар ва туманида навбатдаги ижтимоий сўров ўтказилган. Тадқиқот давомида 500 та ўзини-ўзи бошқариш органи, 5 мингта уй хўжаликлари ҳамда 26,5 минг нафар фуқаро қамраб олинган.

Қайд этилишича, 2021 йилнинг январь-сентябрь ойларида меҳнат ресурслари сони 19 миллион 322,8 минг кишини ташкил этиб, 2020 йилнинг шу даврига нисбатан 101,1 фоизга ёки 201,4 минг кишига ошган. Шунингдек, иқтисодиёт тармоқларида банд бўлганлар сони 13 миллион 609,1 минг кишини ташкил этиб, 2020 йилнинг мос даврига нисбатан 3,1 фоизга (403,9 минг кишига) ошган.

Шу билан бирга, 2021 йилнинг январь-сентябрь ойларида расмий секторда банд аҳоли сони 6 миллион 124,3 минг кишини ташкил қилиб,  2020  йилнинг шу даврига нисбатан юридик шахсларда банд бўлганлар сони 7,9 фоизга ёки 450,5 минг кишига ошгани кузатилган. Жумладан, норасмий секторда банд бўлганлар сони 5 943,9 минг кишини ташкил этиб, жорий йилнинг январь-июнь ойларига нисбатан 4,1 фоиз ёки 254 минг кишига камайган.

Ўтказилган тадқиқот натижаларига кўра, ишга муҳтож бўлганларнинг умумий сони 1 миллион 413,7 минг кишини, ишсизлик даражаси иқтисодий фаол аҳоли орасида 9,4 фоизни ташкил этган. 16–30 ёшгача бўлганлар орасида ишсизлик даражаси — 14,9 фоиз, аёллар орасида ишсизлик даражаси эса — 12,8 фоиз бўлган.

Шунингдек, январь-сентябрь ойларида республикада иқтисодий нофаол аҳоли 4 миллион 300,0 минг кишини ташкил этиб, 2020 йилнинг мос даврига нисбатан 0,6 фоизга ёки 26,3 минг кишига ортиши кузатилган.

Аввалроқ Ўзбекистоннинг халқаро олтин-валюта захираси ўсгани ҳақида хабар берилганди.