Ўзбекистонда монополияларнинг мутлақ ҳуқуқлари босқичма-босқич бекор қилиниши мумкин. Бу ҳақда Norma хабар берди.

Маълум қилинишича, Монополияга қарши қўмита «Рақобат муҳитига салбий таъсир кўрсатадиган тўсиқларни бартараф этиш ва тадбиркорлик фаолияти йўналишларини янада кенгайтириш чора-тадбирлари тўғрисида»ги Президент қарори лойиҳасини ишлаб чиққан.

Ҳужжат билан 2022 йил 1 июлдан бошлаб аэропортлар, йўл қурилиши, электр ва иссиқлик энергияси ишлаб чиқариш, иссиқлик таъминоти, нефть маҳсулотларини сотиш ва бошқа соҳалардаги давлат улушларининг хусусий секторга босқичма-босқич сотилиши назарда тутилган.

Шунингдек, рангли металларнинг парчалари ва чиқиндиларини сотиб олиш, қайта ишлаш, сотиш ва тайёрлаш билан хусусий сектор шуғулланиши мумкинлиги кўзда тутилган.

Қайд этилишича, ҳужжатда хусусий секторни кенг жалб этиш ва монополияларнинг алоҳида ҳуқуқларини бекор қилиш бўйича 2022–2026 йилларга мўлжалланган чора-тадбирлар режасини тасдиқлаш таклиф этилган.

Хусусан, режа хусусийлаштириш, давлат-хусусий шерикликни ривожлантириш йўли билан давлат улушларини босқичма-босқич хусусий секторга ўтказишни кўзда тутади. Шунингдек, рўйхатда кўрсатилган фаолият турларидан эркин фойдаланишни таъминлашга қаратилган «Йўл хариталари»ни ишлаб чиқиш режалаштирилган.

Таъкидланишича, лойиҳа ўзгартирилиши, тўлдирилиши ёки рад этилиши мумкин.

Аввалроқ Ўзбекистонда давлат корхоналарига қўшимча имтиёз бермаслик белгиланиши мумкинлиги хабар қилинганди.