Ўзбекистонда нақд доллар тақчиллиги кузатилмоқдами? Марказий банк раиси жавоб берди
Бугунги кунда нақд хорижий валюта амалиётлари бўйича қўшимча талаблар ёки чекловлар киритилиши режалаштирилмагани айтилди.
Ўзбекистонда нақд доллар ёки евро тақчиллиги ҳолатлари кузатилмаяпти. Бу ҳақда Марказий банк раиси Мамаризо Нурмуратов маълум қилди.
Регулятор раҳбари тижорат банклари ички бозорда нақд хорижий валюта етарлилигини таъминлаб келаётганини таъкидлади.
«Бугунги кунда мамлакатда нақд доллар ёки евро тақчиллиги ҳолатлари кузатилмаяпти. Тижорат банклари ички бозорда нақд хорижий валюта етарлилигини таъминлаб келмоқдалар. Мавжуд нақд валюта захиралари ўртача 3-4 ойлик нақд айирбошлаш операцияларига бўлган талабни тўлиқ қондира олади», — дейди у.
Марказий банк раисининг сўзларига кўра, 2020 йилда пандемиянинг бошланғич даврида авиақатновлар бўйича аксарият давлатлар томонидан киритилган чекловлар сабабли тижорат банклари томонидан нақд хорижий валютанинг мустақил олиб келиниши қийинлашган эди. Бундай вазиятда Марказий банк томонидан нақд хорижий валютани олиб келиш жараёнини марказлашган ҳолда ташкил этилиб, тижорат банкларига тақдим этилган.
Келгусида тақчиллик вазиятлари юзага келадиган бўлса, албатта нақд валютани марказлашган тартибда олиб келиш бўйича зарурий чоралар кўрилиши таъкидланди.
Шунингдек, Мамаризо Нурмуратов «Валютани тартибга солиш тўғрисида»ги қонуннинг 22-моддасига мувофиқ, жисмоний шахлар учун нақд хорижий валютани Ўзбекистондан олиб чиқиб кетиш 100 миллион сўм эквивалентидан ошмаган суммада амалга оширилиши мумкинлиги, юридик шахслар учун нақд хорижий валютани мамлакат ҳудудидан олиб чиқиб кетиш таъқиқланганини эслатди. Ушбу талаб норезидентлар учун ҳам амал қилади.
Раиснинг сўзларига кўра, бугунги кунда нақд хорижий валюта амалиётлари бўйича қўшимча талаблар ёки чекловлар киритилиши режалаштирилмаган.