Ўзбекистонда сув таъминоти оғир томорқа ерлари ва фойдаланишдан чиққан майдонларнинг суғориш харажатларини қисман қоплашга 2020 йилда 50 млрд сўм ажратилади. Бу ҳақда Президент раислигида ўтказилган видеоселектор йиғилишида маълум қилинди.

Хабар қилинишича, йиғилишда томорқа хўжалигини ривожлантириш масаласи кўтарилган. Давлат раҳбари бу борадаги вазифаларни белгилаб берган.

Хусусан, қуйидагилар юзасидан кўрсатмалар берилган:

• 500 минг гектардан зиёд томорқалардан самарали фойдаланиш учун 2022 йилда 100 миллион доллар ажратилади;
• томорқада деҳқончиликни йўлга қўйиш учун оилавий тадбиркорлик дастури шартлари асосида имтиёзли кредитлар берилади;
• томорқада етиштирилган маҳсулотларни кафолатли харид қилиш мақсадида ҳар бир туманда кооперациялар ташкил этилиб, уларни жиҳозлашга 30 фоизгача субсидия берилади;
• сув таъминоти оғир томорқа ерлари ва фойдаланишдан чиққан майдонларнинг суғориш харажатларини қисман қоплашга 2022 йилда 50 миллиард сўм ажратилади.

Шу билан бирга, аҳоли даромадини ошириш ва бозорлар тўкин-сочинлигини таъминлаш учун ҳар бир хонадонда камида 100 та парранда, 20 та қуён, 5–6 та қўй ва эчки, 5 та асалари уялари боқишни йўлга қўйиш зарурлиги кўрсатиб ўтилган. Шунингдек, Президент ҳоким ёрдамчилари маҳаллада ишларни юқорида саналган лойиҳалардан бошлаши кераклигини таъкидлаган.

Аввалроқ Халқаро тикланиш ва тараққиёт банки Ўзбекистон қишлоқ хўжалигига 19,5 миллион евро ажратгани хабар қилинганди. Шунингдек, Шавкат Мирзиёев мева-сабзавот экспорти 5 миллиард долларга етказилишини айтгани ҳақида хабар берилди.