Ўзбекистондаги йирик металлургия заводларини ишончли бошқарув асосида бошқарган SFI Management Group’нинг лицензияси бекор қилинди. Бу ҳақда Молия вазирлиги матбуот хизмати хабар берди.

Қайд этилишича, «SFI Management Group» МЧЖ ХКга тегишли инвестиция активларининг ишончли бошқарувчиси сифатида профессионал фаолиятни амалга ошириш ҳуқуқини берувчи лицензияни бекор қилиш тўғрисида берган аризаси кўриб чиқилди.

Молия вазирлигининг 2022 йил 14 январдаги қарори билан «SFI Management Group» МЧЖ ХКга тегишли, қимматли қоғозлар бозорида инвестиция активларининг ишончли бошқарувчиси сифатида профессионал фаолиятни амалга ошириш ҳуқуқини берувчи лицензия бекор қилинди.

Маълумот учун, SFI Management Group Ўзбекистонда 2017 йил 26 январда рўйхатга олинган. Раҳбари — Улуғбек Муҳамедов, таъсисчиси эса Allied Capital Holding Sa (Швейцария).

Компания 2017 йилда «Ўзметкомбинат» корхонасини, 2018 йилда Олмалиқ кон-металлургия комбинати ва «Узвтроцветмет» заводини бошқаришни бошлаган.

SFI Management Group ва Ўзбекистон ҳукумати 2021 йил февраль ойида «Ўзметкомбинат», ОКМК ва «Узвтроцветмет» акциядорлик жамиятларидаги давлат улушларини ишончли бошқариш бўйича шартномаларни бекор қилиш масаласи бўйича келишиб олганди.