«Ўзсаноатқурилишбанк» Германия банки билан 80 млн евролик битим имзолади
Global Textile Infinity лойиҳаси учун Landesbank Baden-Wurttemberg билан 66,8 млн евро миқдорида индивидуал қарз битими имзоланди
«Ўзсаноатқурилишбанк» Германиянинг Landesbank Baden-Wurttemberg банки билан ҳамкорликни кенгайтирмоқда. Бу ҳақда банк матбуот хизмати хабар берди.
Маълум қилинишича, «Ўзсаноатқурилишбанк» вакиллари Ўзбекистон делегацияси таркибида Германияда бўлиб турибди. Ташриф доирасида 8 ноябрь куни «Ўзсаноатқурилишбанк» ҳамда Германиянинг Landesbank Baden-Wurttemberg банки ўртасида икки томонлама ҳамкорликни мустаҳкамлаш ҳамда ривожлантиришга қаратилган қатор ҳужжатлар имзоланган.
Таъкидланишича, Global Textile Infinity лойиҳаси учун Landesbank Baden-Wurttemberg билан 66,8 миллион евро миқдорида индивидуал қарз битимига имзо чекилган
Шунингдек, томонлар «Ўзсаноатқурилишбанк» Ўзбекистонда бизнесни ривожлантиришга йўналтирилган молиявий ресурслари ҳажмини оширишни, шу жумладан маҳаллий экспортчилар ва импортчиларни қўллаб-қувватлашни назарда тутувчи 80 миллион евро миқдорида савдони молиялаштириш бўйича қўшимча битим имзолаган.
Маълумот ўрнида, Landesbank Baden-Wurttemberg — Германиянинг ўнта энг йирик банкларидан бири ҳисобланади.
Аввалроқ Халқаро тикланиш ва тараққиёт банки Ўзбекистон қишлоқ хўжалигига 19,5 миллион евро ажратгани хабар қилинганди. Шунингдек, Тошкентда Туркия компанияси билан электр энергияси бўича 109 млн долларлик лойиҳа амалга оширилиши ҳақида хабар берилди.
