Москвада Ўзбекистон бош вазирининг ўринбосари — инвестициялар ва ташқи савдо вазири Сардор Умурзоқов Россия иқтисодий ривожланиш вазири Максим Решетников билан музокаралар ўтказди. Бу ҳақда вазирлик матбуот хизмати хабар берди.

Маълум қилинишича, учрашувда икки томонлама иқтисодий ҳамкорлик масалалари кўриб чиқилган. Шу жумладан, Ўзбекистон ва Россия ўртасидаги Ҳудудлараро ҳамкорликнинг II форуми доирасида имзоланган қўшма инвестиция лойиҳалари ва савдо битимларини амалга оширишни жадаллаштириш чора-тадбирлари муҳокама қилинган.

Қайд этилишича, томонлар бўлиб ўтган тадбирнинг аҳамиятини юқори баҳолаб, форумнинг Ўзбекистон Президентининг Россияга ташрифининг иқтисодий кун тартибини амалий мазмун билан тўлдиришнинг самарали воситасига айланганини ҳамда ҳудудлараро ҳамкорликни янги босқичга олиб чиқишга имкон яратганини қайд этган.

Шунингдек, алоҳида лойиҳаларни амалга оширишнинг бориши батафсил кўриб чиқилган, мавжуд масалаларни ҳал қилиш механизмлари шакллантирилган ҳамда уларни ўз вақтида ҳаётга татбиқ этишга кўмаклашиш борасида навбатдаги тадбирлар белгиланган. Бундан ташқари, белгиланган вазифаларни бажариш ҳамда истиқболли йўналишларда муносабатларни изчил кенгайтириш учун мулоқотни ривожлантириш мақсадга мувофиқлиги таъкидланган.

Музокаралар якунида томонлар эришилган келишувлар ижросини таъминлаш бўйича келгусида ҳамкорликда иш олиб боришга содиқлигини билдирган.

Аввалроқ Ўзбекистон ва Россия II Ҳудудлараро ҳамкорлик форумида 9 миллиард долларлик битим имзолагани хабар қилинганди.