Сербияда ишламоқчи бўлганларга бўш иш ўринлари таклиф қилинди
Иш ҳақи миқдори соатига 3 еврони ташкил этади.
Ўзбекистон Ташқи меҳнат миграцияси агентлиги Сербияда ишламоқчи бўлган фуқароларни танловга таклиф қилди. Бу ҳақда агентлик матбуот хизмати хабар берди.
Маълум қилинишича, Сербияда мавсумий қишлоқ хўжалиги ишларига Ўзбекистон фуқаролари таклиф этилади. Иш ҳақи соатига 3 евродан тўланади.
Таъкидланишича, фуқароларнинг турар жойи ва овқатланиш харажатлари иш берувчи томонидан қопланади. Номзодларга қуйидаги талаблар қўйилади:
- 18–45 ёшгача бўлиш;
- мактаб, лицей ёки касб-ҳунар коллежини тамомлаган бўлиш;
- рус ёки инглиз тилида мулоқот қила олиш;
- судланмаган бўлиш.
Мазкур бўш иш ўринларига қизиқиш билдирган фуқаролар учун танловлар Тошкент шаҳри ва Сирдарё, Жиззах, Тошкент вилоятлари учун 4 апрель куни Тошкент шаҳри Олмазор тумани, Қамарнисо 1 манзилида, Ташқи меҳнат миграцияси агентлиги биносида бўлиб ўтади.
Шунингдек, Самарқанд, Бухоро, Навоий, Сурхондарё ва Қашқадарё вилоятлари учун 5 апрель куни Самарқанд шаҳри, Нарпай кўчаси 7-Б уй манзилида, «Ишга марҳамат» мономарказида ўтказилади.
Хоразм вилояти ва Қорақалпоғистон учун эса 7 апрель куни Урганч шаҳри, Байналмилалчи кўчаси, 6-уй манзилида, «Ишга марҳамат» мономаркази биносида бўлиб ўтади.
Танловда қатнашиш истагида бўлган фуқаролар ўзлари билан хорижга чиқиш паспорти сканер варианти ва 3,5х4,5 ҳажмдаги фотосуратнинг электрон шаклини олиб келиши шарт.
Аввалроқ Японияда ишламоқчи бўлганлар «Махсус малака сертификати»ни Ўзбекистонда олиши мумкин бўлгани хабар қилинганди. Шунингдек, рублнинг қулаши сабабли ўзбекистонлик айрим меҳнат муҳожирлари Россияни тарк эта бошлагани ҳақида хабар берилди.