Standard & Poor’s Global Ratings халқаро рейтинг агентлиги «Ўзсаноатқурилишбанк»нинг «BB-» рейтинг даражасини тасдиқлаб, кредит рейтинги прогнозини «салбий»дан «барқарор»га оширди. Бу ҳақда банк ахборот хизмати хабар берди.

Маълум қилинишича, барқарор прогноз банкнинг резервларни шакллантиришда қўшимча муҳим эҳтиёжлар ёки кредитлашнинг ҳаддан зиёд ортиб кетиши билан боғлиқ ҳолда таваккалчиликлар пасайишига кўра капиталлашувнинг адекват кўрсаткичларини сақлаб қолишига асосланади.

S&P Global Ratings томонидан қайд этилишича, 2024 йилда амалга оширилиши кўзда тутилган хусусийлаштириш жараёнларига тайёргарликка қарамасдан, келгуси икки йилда банк ўзининг мустаҳкам бизнес-позицияси ҳамда давлат билан яқин алоқаларини сақлаб қолади.

«‘Ўзсаноатқурилишбанк’ рейтинглари бўйича ‘барқарор’ прогноз Ўзбекистонда капиталнинг адекват захиралари, активлар сифатининг яхшиланиши ва мустаҳкам бизнес-позиция банк кредитлаш кўрсаткичларини яқин 12 ой ичида сақлаб қолишини таъминлайди», — дея хулоса қилган Standard & Poor’s.

Қайд этилишича, бугунги кунда банк тизимида трансформациялаш жараёнининг сўнгги босқичини якунлаш бўйича кенг кўламли ишлар олиб борилмоқда. Бу ўз ўрнида, банкнинг молиявий кўрсаткичлари ҳамда операцион самарадорликнинг юксалишига ижобий таъсир кўрсатади. «Ўзсаноатқурилишбанк» ўзининг мамлакат молия бозоридаги ўрнини мустаҳкамлаб, инвесторлик базасини кенгайтириб бормоқда.

Аввалроқ «Ўзсаноатқурилишбанк» хусусийлаштирилиши ҳақида хабар берилганди.