Ҳамкасбларингиз қанча маош олишларини билмоқчимисиз? Агар улар сизнинг маошингизни билишсачи? Маълум бўлишича, бу масалада шаффофлик иш ҳақи тенгсизлигига қарши курашишга ёрдам беради. Бу ҳақда АҚШнинг CNBC телеканали ёзмоқда.

HEC Paris бизнес мактабидан тадқиқотчилар Томаш Облой ва Юта университети бизнес мактабидан Тодд Зенгер 100 минг америкалик коллеж ходимларининг 14 йил давомидаги маошларини солиштирган. Улар ҳамкасбларнинг маошлари ҳақида билиш бир муассасада ва бутун саноатда бир хил лавозимларда ишлайдиган ходимларнинг иш ҳақи тенглигига таъсир қилишини аниқлаган.

Маълум бўлишича, ошкоралик тамойилига амал қилган ташкилотларда ишлаётган бир хил лавозимдаги турли жинсдаги ходимлар ўртасидаги иш ҳақи фарқи 45 фоизга камайган. Ушбу тамойил амалга оширилгандан кейин умуман барча ходимлар ўртасидаги иш ҳақи тенгсизлиги тахминан 20 фоизгача камайган.

Тадқиқот муаллифларининг сўзларига кўра, хусусий секторда кўплаб иш берувчилар ҳали ҳам молиявий масалаларда шаффофликка салбий муносабатда бўлишда давом этмоқда. Бундай сиёсат юқори истеъдодларни жалб қилишни қийинлаштиради.

Америка Хотин-қизлар сиёсати тадқиқот институти томонидан ўтказилган тадқиқотга кўра, америкалик иш берувчиларнинг 41 фоизи ходимларга иш ҳақини ҳамкасблари билан муҳокама қилмасликни маслаҳат беради, 25 фоизи эса буни очиқчасига тақиқлайди.