«Ташаббусли бюджет» лойиҳаларига иккинчи ярим йилда яна 1 трлн сўм йўналтирилади
Шавкат Мирзиёев «Ташаббусли бюджет» лойиҳаларига иккинчи ярим йилда яна 1 трлн сўм йўналтирилишини айтди. Президентнинг таъкидлашича, «бу тажриба жуда катта натижа беряпти» ва «одамлар бундай лойиҳаларга дахлдор бўлиб, бунёд қилинган инфратузилмадан фахрланиб, уларни асраб-авайлаб фойдаланяпти».
Ўзбекистонда «Ташаббусли бюджет» лойиҳаларига иккинчи ярим йилда яна 1 триллион сўм йўналтирилади. Бу ҳақда Шавкат Мирзиёев 4 август куни ўтказилган йиғилишда айтиб ўтди.
Президентнинг таъкидлашича, «Очиқ бюджет» доирасида ўтган 6 ойда аҳоли талабига мос 2 мингдан зиёд лойиҳалар бошланган. Маблағлар тежалиб, манзилли сарфланган.
Маҳаллаларда 953 та мактаб ва боғча, 447 километр ички йўллар, 27 та қудуқ 60 километр ичимлик суви ва канализация тармоқлари учун 4,5 миллион аҳоли овоз берган ва 1,1 триллион сўм йўналтирилган.
«Бизнинг тажрибамизда бу биринчи тажриба ва жуда катта натижа беряпти. Одамлар бевосита шу жараёнларга ўзининг иштирокини билдиряпти. Бундай лойиҳалар учун яна қўшимча 1 триллион сўм беришни мўлжал қилганмиз. Энг муҳими, одамлар бундай лойиҳаларга дахлдор бўлиб, бунёд қилинган инфратузилмадан фахрланиб, уларни асраб-авайлаб фойдаланяпти», — дейди давлат раҳбари.
Аввлароқ ташаббусли бюджетлаштириш жараёнларида ҳар бири 2 мингдан ортиқ овоз тўплаган, лекин ғолиб деб топилмаган 139 та лойиҳани амалга ошириш учун қўшимча равишда 85,4 миллиард сўм маблағ ажратилиши хабар қилинганди.
«Ташаббусли бюджет-2021»
Маълумот ўрнида, 2021 йилда ташаббусли бюджет жараёни давомида фуқаролардан келган таклифларни молиялаштириш учун 407,1 миллиард сўм йўналтирилган. 2021 йилда ўтказилган ташаббусли бюджет жараёни давомида фуқаролар томонидан жами 41 мингдан ортиқ таклифлар келиб тушган ва ушбу таклифларга 1,1 миллиондан ортиқ фуқаролар ўз овозларини берган.
Натижада мамлакат бўйлаб қарийб 1600 та таклифлар ғолиб деб топилган ҳамда ушбу таклифларни молиялаштириш учун «Фуқаролар ташаббуси жамғармаси» маблағлари хисобидан жами 407,1 миллиард сўм йўналтирилган.