Ўзбекистонда «Ташаббусли бюджет»да икки мингдан ортиқ овоз олган барча лойиҳага маблағлар ажратилади. «Туман ва шаҳар бюджетлари маблағларини жамоатчилик фикри асосида шакллантирилган тадбирларга йўналтириш жараёнларида фуқароларнинг иштирокини янада қўллаб-қувватлаш тўғрисида»ги Президент қарори қабул қилинди.

Қарорга мувофиқ, ташаббусли бюджетлаштириш жараёнларида ҳар бири 2 мингдан ортиқ овоз тўплаган, лекин ғолиб деб топилмаган 139 та лойиҳани амалга ошириш учун қўшимча равишда 85,4 миллиард сўм маблағ ажратилади.

Қарорга кўра, ҳокимлар ҳар ойда ОАВ вакиллари иштирокида ташаббусли бюджет тадбирлари молиялаштирилиши ва бажарилиши тўғрисидаги ҳисоботларни жамоатчиликка эълон қилиб боради.

Маълумот учун, 2022 йилнинг биринчи чорагида ўтказилган ташаббусли бюджетлаштириш жараёни натижалари бўйича фуқаролар томонидан илгари сурилган 2215 та лойиҳа ғолиб деб топилиб, лойиҳаларни амалга ошириш учун 1,1 триллион сўм маблағ ажратилиши эълон қилинганди.

Ўзбекистоннинг 2022–2026 йилларга мўлжалланган тараққиёт стратегияси лойиҳасида 2022 йил ҳар бир туман бюджетининг камида 5 фоизи аҳоли таклифларига ажратилиши белгиланганди.

Қайд этилишича, хар бир туман бюджетининг камида 5 фоизини «Фуқаролар бюджети» дастури доирасида аҳолининг таклифлари асосида энг долзарб муаммоларни ечишга сарфлашни ташкил қилиш режалаштирилган.

«Ташаббусли бюджет-2021»