«Ташаббусли бюджет»нинг иккинчи мавсуми бошланди
«Ташаббусли бюджет» жараёнининг иккинчи мавсуми 24 августдан старт олди. Ушбу мавсум учун республика бўйлаб қарийб 1 трлн 62 млрд сўм маблағ йўналтирилиши кутилмоқда.
Ўзбекистонда «Ташаббусли бюджет»нинг иккинчи мавсуми 24 августдан бошланди. Бу ҳақда Молия вазирлиги матбуот хизмати хабар берди.
Ушбу мавсум доирасида фуқаролар томонингиздан илгари суриладиган лойиҳаларни молиялаштириш учун республика бўйлаб қарийб 1 триллион 62 миллиард сўм маблағлар йўналтирилиши кутилмоқда.
Вазирликнинг эслатишича, Humans алоқа оператори абонентлари овоз бериш жараёнларида иштирок этиш имкониятига эга эмас.
Шунингдек, порталда рўйхатдан ўтган фойдаланувчилар овоз бериш жараёнида телефон рақамлари орқали овоз бериши жорий қилинган.
Аввалроқ Шавкат Мирзиёев «Ташаббусли бюджет» лойиҳаларига иккинчи ярим йилда яна 1 триллион сўм йўналтирилишини айтганди.
Президентнинг таъкидлашича, «бу тажриба жуда катта натижа беряпти» ва «одамлар бундай лойиҳаларга дахлдор бўлиб, бунёд қилинган инфратузилмадан фахрланиб, уларни асраб-авайлаб фойдаланяпти».
Шунингдек, ташаббусли бюджетлаштириш жараёнларида ҳар бири 2 мингдан ортиқ овоз тўплаган, лекин ғолиб деб топилмаган 139 та лойиҳани амалга ошириш учун қўшимча равишда 85,4 миллиард сўм маблағ ажратилиши хабар қилинганди.
«Ташаббусли бюджет-2021»
Маълумот ўрнида, 2021 йилда ташаббусли бюджет жараёни давомида фуқаролардан келган таклифларни молиялаштириш учун 407,1 миллиард сўм йўналтирилган. 2021 йилда ўтказилган ташаббусли бюджет жараёни давомида фуқаролар томонидан жами 41 мингдан ортиқ таклифлар келиб тушган ва ушбу таклифларга 1,1 миллиондан ортиқ фуқаролар ўз овозларини берган.
Натижада мамлакат бўйлаб қарийб 1600 та таклифлар ғолиб деб топилган ҳамда ушбу таклифларни молиялаштириш учун «Фуқаролар ташаббуси жамғармаси» маблағлари хисобидан жами 407,1 миллиард сўм йўналтирилган.
