Tinkoff Bank ребрендинг ўтказади. Олег Тиньков Россиянинг Украинага босқинини қоралаганди
Банк бизнесмен Олег Тиньков билан боғланмайдиган янги номга эга бўлади.
Tinkoff 2022 йилда ребрендинг ўтказади ва эски бренддан фойдаланишни тўхтатади. Бу ҳақда кредит ташкилотининг Telegram каналида хабар берилди.
Таъкидланишича, банк бизнесмен Олег Тиньков билан боғланмайдиган янги номга эга бўлади.
«Биз Tinkoff брендини тарихда қолдиришга қарор қилдик ва янги жонли бренд остида Россия бозорида энг яхши молиявий маҳсулотлар ва хизматларни ишлаб чиқишда давом этамиз», дейилади баёнотда.
Компания бу қадамга узоқ вақтдан бери тайёргарлик кўрганини ва яқинда содир бўлган воқеалар бу қарорни янада долзарблаштирганини тушунтирди.
«Tinkoff узоқ вақтдан бери ном брендининг асл маъносидан ошиб кетди: бугунги кунда Tinkoff фаол чакана мижозлар сони бўйича мамлакатдаги иккинчи йирик хусусий банкдир, Тинкофф бизнесини кўп йиллар давомида рус менежерлари жамоаси муваффақиятли бошқариб келмоқда ва Россия ҳамда хорижда ўн минглаб инвесторлар банкка эгалик қилади», дейилади ахборотда.
Олег Тиньков сўнгги йилларда асосан Лондонда яшаган ва у ерда лейкемиядан даволанган. Шу йилнинг март ойидан бери тадбиркор Британия санкциялари остида қолди. Компания таъкидлашича, таъсисчи узоқ вақтдан бери ишсиз бўлган ва ҳозир у компаниянинг «20 миллион мижозидан бири, холос».
Тиньковнинг танқиди
Банк асосчиси Олег Тиньков Россиянинг Украинага босқини ҳақида кескин сўзлар ёзилган пост эълон қилди. Постда Тиньков ҳозирги воқеалардан бирорта ҳам манфаатдор кўрмаётгани, россияликларнинг 90 фоизи босқинга қарши эканини айтди ва инглиз тилида Ғарбни янада оқилона ва инсонпарвар бўлишга ҳамда содир бўлаётган воқеаларни тўхтатишга чақирди.
Шундан сўнг Tinkoff Bank баёнот эълон қилди, унда ташкилот ўз асосчисининг сўзларини шахсий фикр деб қабул қилишни сўради.
Банк хабарида айтилишича, Олег Тиньков кўп йиллар давомида Tinkoff Group компанияларида қарор қабул қилувчи шахс бўлмаган, у Tinkoff ходими ҳам эмас, Россияда узоқ вақт бўлмаган ва сўнгги йилларда соғлиғи билан боғлиқ муаммолар билан банд бўлган.
Олег Тиньков аввалроқ — февраль ойининг охирида ҳам Россиянинг Украинага босқинини қоралаганди.
«Мен ўзим, деярли икки марта ҳаётнинг нариги томонида бўлганимда, сўнгги 2 йил ичида унинг қанчалик нозик эканига амин бўлдим! Ва у биз эга бўлган ягона нарса! Ҳозир Украинада ҳар куни бегуноҳ одамлар ўлмоқда, буни ақлга сиғдириб ва қабул қилиб бўлмайди!», — деб ёзганди Тиньков.
Унинг таъкидлашича, давлатлар пулни ҳарбий ҳаракатларга эмас, балки одамларни даволаш ва илмий тадқиқотларга сарфлашлари керак.