Туркияда февраль ойида инфляция даражаси 54 фоиздан ошиб, 2002 йилдан бери энг юқори даражага етди. Бу ҳақда Туркия статистика институти (Turkstat) хабар берди.

Февраль ойида Туркияда истеъмол нархлари 2021 йилнинг февраль ойига нисбатан 54,4 фоизга ошди. Шундай қилиб, ўсиш суръати кетма-кет тўққизинчи ой тезлашди ва 2002 йил мартидан бери максимал даражага етди.

Инфляция декабрь ойидаги 48,7 фоизга нисбатан тезлашди ва Trading Economics ташкилоти томонидан сўралган таҳлилчиларнинг консенсус прогнози — 53 фоиздан ҳам юқори бўлди.

Энг сезиларли ўсиш транспорт хизматлари (75,8 фоиз), мебель ва маиший техника (64,8 фоиз), озиқ-овқат ва алкоголсиз ичимликлар (64,5 фоиз), меҳмонхоналар, кафе ва ресторанлар (55,2 фоиз), шунингдек, коммунал хизматлар (49,7 фоиз) нархларида кузатилди.

Февраль ойида Туркиядаги истеъмол нархлари январь ойга нисбатан 4,8 фоизга ошди. Январь ойида ўсиш 11,1 фоизни ташкил этган эди.

Айни дамда ишлаб чиқарувчилар нархларининг ўсиш суръати (PPI индекси) январь ойидаги 93,5 фоиздан февраль ойида 2021 йилнинг шу ойига нисбатан 105 фоизгача ўсди.

Шунингдек, 3 март куни доллар курси аввалги сессиядаги 14,0189 лирага нисбатан 14,1369 лирага кўтарилди. 2021 йил мобайнида турк миллий валютаси деярли 2 баравар арзонлашди.

Аввалроқ Туркия инфляция билан курашиш учун асосий озиқ-овқат маҳсулотларига ҚҚСни пасайтиргани хабар қилинганди. Шунингдек, Эрдўғон инфляция ҳақидаги ахборотдан сўнг статистика бошқармаси бошлиғини ишдан олгани ҳақида хабар берилди.