Uzbekistan Airways 1 ноябрдан бошлаб авиация техникасига қайта тайёрлаш мақсадида номзодларни саралаш учун ҳужжатлар қабул қилинишни бошлади. Бу ҳақда компания матбуот хизмати хабар берди.

Маълум қилинишича, саралаш танловида иштирок этиш учун аризаларни қабул қилиш 2021 йилнинг 1 ноябридан бошлаб 2021 йилнинг 31 декабрига қадар амалга оширилади. Қабул фуқаро авиацияси учувчиларини тайёрлаш билим юртлари битирувчилари ҳамда фуқаро авиацияси учувчиси гувоҳномаси соҳиблари ўртасида амалга оширилади.

Фуқаро авиацияси учувчиларни тайёрлаш билим юртлари битирувчилари орасидаги номзодларга қуйидаги талаблар қўйилади:

• Ўзбекистон фуқаролигига эга 21 ёшдан 35 ёшгача бўлган фуқаролар;
• амалдаги паспорт ёки шахсини тасдиқловчи гувоҳнома (ID Card), шунингдек халқаро паспортнинг мавжудлиги;
• учувчилар билим юртини тамомлагани тўғрисидаги диплом (сертификат) ҳамда тайёргарлик ҳажми ва бир ёки икки двигателли ҳаво кемаларида 150 соатдан кам бўлмаган парвоз соатларини тасдиқловчи ҳужжат;
• учувчилар билим юртини тамомлаганидан кейин 24 ойдан ортиқ бўлмаган танаффус;
• IR (Instrument rating) дастури бўйича ўқув курсини тугатгани тўғрисидаги сертификат;
• Парвоз китобчаси ёки унинг аналоги;
• ICAO шкаласи бўйича инглиз тилини билиш даражасини тасдиқловчи хорижий давлат ёки Ўзбекистон Авиация маъмурияти томонидан берилган амалдаги ҳужжат;
• FA учувчиси (CPL) гувоҳномаси;
• Ўзбекистонда тан олинган олий маълумотни тасдиқловчи ҳужжат (нострификация), агар мавжуд бўлса;
• эркак номзодлар учун ҳарбий хизматга яроқлилик белгиси билан Ўзбекистон ҳарбий гувоҳномасининг мавжудлиги.

Фуқаро авиацияси учувчиси гувоҳномаси соҳиблари орасидан номзодларга қуйидаги талаблар қўйилади:

• Ўзбекистон фуқаролигига эга 50 ёшдан ошмаган шахслар;
• амалдаги паспорт ёки шахсини тасдиқловчи гувоҳнома (ID Card), шунингдек халқаро паспортнинг мавжудлиги;
• ҲКК (ҳаво кемаси командири) ёки иккинчи учувчи сифатида 500 соатдан кам бўлмаган парвоз вақти;
• хорижий давлат ёки Ўзбекистон Авиация маъмурияти томонидан берилган FA учувчиси гувоҳномаси (CPL, ATPL);
• Ариза берилган санагача 12 ойдан кам бўлмаган муддатдаги парвоз ишидаги танаффус;
• FA учувчилар билим юртини тамомлаганлиги тўғрисидаги ҳужжат;
• ICAO шкаласи бўйича инглиз тилини билиш даражасини тасдиқловчи хорижий давлат ёки Ўзбекистон
• Авиация маъмурияти томонидан берилган амалдаги ҳужжат;
• меҳнат дафтарчаси ёки сўнгги 5 йил давомида фаолият юритган ва эгаллаб турган лавозими тўғрисидарасмий маълумот;
• Uzbekistan Airways томонидан эксплуатация қилинаётган ҳаво кемасида қайта тайёргарликдан ўтгани тўғрисидаги ҳужжат (агар номзодда шундай ҳужжат бўлса);
• Uzbekistan Airways авиакомпаниясида учувчи сифатида ишлашга қандай сабаб асосий туртки бўлгани тўғрисида ўзбек, рус ёки инглиз тилларида мотивацион хати;
• Ўзбек, рус ёки инглиз тилларида тавсиянома.

Аввалроқ Uzbekistan Airways Ригага авиақатновлар сонини ошириши маълум қилинганди.