АҚШнинг Visa компанияси криптовалюталар бўйича консалтинг хизматини йўлга қўйди. Бу ҳақда «Интерфакс» хабар берди.

Қайд этилишича, хизмат Visa консалтинг-таҳлилий бўлимининг бир қисмига айланади ва молия институтлари, чакана сотувчилар ва бошқа компаниялар билан ишлайди, уларга криптовалюта бозорлари бўйича маслаҳат беради, шу жумладан транзакцияларни қўллаб-қувватлаш учун улардан фойдаланиш мумкин бўлган NFT билан боғлиқ тадқиқотлар олиб боради.

Хабарга кўра, Visa ўзининг янги хизмати биткоин ва бошқа криптовалюталарнинг компаниялар томонидан тарқалиши ва ўзлаштирилишини тезлаштиришига умид қилмоқда.

Visa криптовалюталар унинг кейинги ўсиши учун, айниқса кредит карталаридан ташқари тўловларнинг бошқа соҳаларида ҳам кенгайиб бораётган бир вақтда асосий майдон бўлиши мумкин, деб ҳисоблайди.

Компания, аллақачон, мижозларга тўловлар учун криптовалюталардан фойдаланиш имконини берувчи маҳсулотларни ишлаб чиқмоқда.

Март ойида Visa стейблкойнларда (stablecoin — бу маҳаллий валюталар ва активлар томонидан қўллаб-қувватланадиган криптовалюталарнинг умумий номи), хусусан, АҚШ долларига боғланган USD Coin билан операцияларни амалга оширишни бошлаганини эълон қилганди.

Бундан ташқари, 2020 йилда компания турли мамлакатлар марказий банклари томонидан чиқарилган рақамли валюталар билан ишлай бошлаган.

Маълумот учун, 2020 йил 1 октябрдан 2021 йил 30 сентябргача бўлган даврда Visa рақамли валюталар билан тахминан 3,5 миллиард долларлик транзакцияларни амалга оширган.

«Криптовалюта биз учун улкан янги вертикал ва ўсиш учун имкониятдир. Биз ушбу бизнесни ривожлантиришга эътибор қаратишда давом этамиз», — дея қўшимча қилди компания вакили Никола Плечаш.

Visa ва LRW маркетинг компанияси томонидан ўтказилган сўров натижаларига кўра, одамларнинг 94 фоизи криптовалюталар ҳақида маълум даражада хабардор бўлиб, уларнинг деярли учдан бир қисми криптовалюталардан сармоя ёки айирбошлаш воситаси сифатида фойдаланган. Сўровда дунёнинг турли давлатларидан жами 6 минг киши иштирок этди.

Аввалроқ Visa халқаро тўлов тизими йирик бозорлар учун карталар орқали тўлов тарифларини пасайтиришга қарор қилгани хабар қилинганди.