«Яндекс»нинг Европадаги озиқ-овқат етказиб бериш хизмати Yango Deli («Яндекс.Лавка»нинг халқаро бренди) Буюк Британия ва Франция бозорларини тарк этиш ҳақида ўйламоқда. Бу ҳақда Bloomberg хабар берди.

Маълумотларга кўра, компания ўрганаётган эҳтимолий вариантлар орасида Буюк Британиядаги бизнесни сотиш ва Франция бўлимининг ёпилиши бор.

«Лондонда гиперлокал етказиб бериш бозори (чекланган радиусда тез етказиб бериш) анча кенг ва рақобатбардош», — деди «Яндекс.Лавка» вакили.

Унинг таъкидлашича, компания ўзининг Буюк Британиядаги бизнесига рақобатчилар ва инвесторлар томонидан жиддий қизиқиш кўрмоқда ва ривожланишнинг турли вариантларини кўриб чиқмоқда. Хусусан, «Яндекс» бошқа бозорлардаги франчайзинг ҳамкорлари билан хизматни ривожлантириш тажрибасига эга.

«Лондондаги Yango Deli яхши динамикани кўрсатмоқда ва 21 февраль куни яна бир даркстор (етказиб бериладиган омбор) очилди», — деди «Яндекс.Лавка» вакили.

Париждаги компания вакилининг айтишича, вазият ёмонлашмоқда: компания у ердаги фаолиятини босқичма-босқич тўхтатмоқда. Унинг таъкидлашича, бу қарор февраль ойи бошида қабул қилинган.

«Бу кам сонли дарксторларга эга бўлган пилот лойиҳа эди ва у бизнинг ички умидларимизни оқламади», — дея қўшимча қилди у.

«Яндекс.Лавка» француз бозорига кириши 2021 йил апрель ойида маълум бўлган эди. Хизмат 2021 йил июль ойида Буюк Британияда иш бошланишини эълон қилди. 2020 йилда «Яндекс.Лавка» Исроил бозорига Deli by Yango номи билан кирди.

Британиялик Yango Deli 2021 йил октябрь ойида тўлиқ ишлай бошлади, дастлаб тўртта дарксторлари бўлган. Бешинчиси очилгандан сўнг, «Яндекс» омборларининг бутун тармоғи 400 дан ортиқ пунктни ташкил этган.

Аввалроқ «Яндекс»нинг собиқ ходими Instagram’нинг яна бир русча вариантини ишга туширгани хабар қилинганди. Шунингдек, «Яндекс» АҚШда ҳайдовчисиз автомобилларни синовдан ўтказишни тўхтатгани ҳақида хабар берилди.